ახალციხის სასამართლომ თენგიზ ზედგინიძის სარჩელი ნაწილობრივ დააკმაყოფილა

11 აპრილს ახალციხის რაიონულმა სასამართლომ ახალციხის მუნიციპალიტეტის ყოფილი თანამშრომლის თენგიზ ზედგინიძის სარჩელი ნაწილობრივ დააკმაყოფილა. მოსამართლე გიორგი ლონდარიძემ ბათილად ცნო ახალციხის მუნიციპალიტეტის საკრებულოს თავმჯდომარის 2013 წლის 25 დეკემბრის ბრძანება (N263) ახალციხის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურის თანამშრომელთა დისციპლინური პასუხისმგებლობის დაკისრების თაობაზე, თენგიზ ზედგინიძის ნაწილში.

საკრებულოს დაევალა, საქმის გარემოებათა გამოკვლევისა და შეფასების შემდეგ, ახალი ინდივიდუალური ადმინისტრაციულ-სამართლებრივი აქტი გამოსცეს, ანუ, ხელახლა შეისწავლოს თენგიზ ზედგინიძის დისციპლინური პასუხისმგებლობის საკითხი;

რაც შეეხება კუთვნილი პრემიის დარიცხვას, სასამართლომ ამ ნაწილში ზედგინიძის სარჩელი არ დააკმაყოფილა. რადგან საკრებულომ ზედგინიძის დისციპლინური პასუხისმგებლობის საკითხზე ხელახლა უნდა იმსჯელოს, მხოლოდ აღნიშნულის გადაწყვეტის შემდეგ შეუძლია ზედგინიძეს სასამართლოს პრემიის დარიცხვის მოთხოვნით მიმართოს.

შეგახსენებთ, თენგიზ ზედგინიძე სარჩელში ახალციხის მუნიციპალიტეტის საკრებულოს მიერ მის მიმართ გამოცხადებული საყვედურის გაუქმებასა და კუთვნილი პრემიის დარიცხვას ითხოვდა.

ზედგინიძემ, ეკონომიკისა და ინფრასტრუქტურის სამსახურის 3 თანამშრომელთან ერთად, გაფრთხილება 2013 წლის დეკემბერში, ახალციხის მუნიციპალიტეტის ბაღებში ხარვეზებით ჩატარებული სარემონტო სამუშაოების გამო მიიღო. ამავე მიზეზით მას საახალწლო პრემია არ დაურიცხეს.

[თამუნა უჩიძე, ახალციხე]