ახალციხის გამგეობიდან გათავისუფლებულმა თანამშრომლებმა სასამართლო მოიგეს

სასამართლოს გადაწყვეტილებით ახალციხის მუნიციპალიტეტის გამგეობის ყოფილი თანამშრომლები, კადრებისა და საქმის წარმოების საკითხებში წამყვანი სპეციალისტი ეკა ტატალაშვილი, ასევე ეკონომიკისა და ინფრასტრუქტურის სამსახურის უფროსი თენგიზ ზედგინიძე სამუშაო ადგილებზე უნდა დაბრუნდნენ.

ტატალაშვილმა სასამართლო პროცესი დღეს, 3 ივნისს, ზედგინძემ კი 23 მაისს მოიგო. ორივე მათგანი ახალციხის მუნიციპალიტეტის გამგეობიდან საჯარო მოხელეთა შესარჩევ კონკურსში მონაწილეობის მიღების შემდეგ, 2014 წლის თებერვალში, იმ მიზეზით გაათავისუფლეს, რომ მათ საკონკურსო პირობები ვერ დააკმაყოფილეს.

ტატალაშვილთან ერთად სამსახურიდან გათავისუფლებას ასაჩივრებდა კადრებისა და საქმის წარმოების საკითხებში ყოფილი წამყვანი სპეციალისტი მეგი კაჭკაჭიშვილიც, თუმცა, მოსამართლემ მისი სარჩელი არ დააკმაყოფილა.

„სასამართლო პროცესზე გამოიკვეთა, რომ კაჭკაჭიშვილი 2011 წელში, ანუ თავიდანვე, დანიშნული იყო მოვალეობის შემსრულებლად კონკურსის შედეგებამდე, ხოლო ტატალაშვილი მუდმივად. ამიტომ ტატალაშვილის ადგილზე კონკურსი არ უნდა გამოცხადებულიყო. კაჭკაჭიშვილს კი კონკურსის გავლა ეკუთვნოდა და ის, თუ ვის შეარჩევდა საკონკურსო კომისია, ეს მათი უფელბა იყო“, - გვიხსნის ახალციხის რაიონული სასამართლოს მოსამართლე გოჩა ჯეირანაშვილი და ამატებს, რომ ამიტომ, მან ტატალაშვილის სარჩელი დააკმაყოფილა, კაჭკაჭიშვილის კი არა.

ტატალაშვილი აცხადებს, რომ სამსახურში აუცილებლად დაბრუნდება. გამგეობაში დაბრუნებას აპირებს თენგიზ ზედგინიძეც.

თუმცა ჯერ, ადგილობრივ თვითმმართველობას სასამართლოს გადაწყვეტილებები არ ჩაბარებია, შესაბამისად უცნობია, ამ გადაწყვეტილებებს გაასაჩივრებენ თუ არა.

„როგროც კი მივიღებთ გადაწყვეტილებებს იურისტებთან ერთად დავსხდებით და გადავწყვეტთ გავასაჩივრებთ თუ არა“, - ამბობს ახალციხის მუნიციპალიტეტის გამგებლის დროებით მოვალეობის შემსრულებელი მალხაზ ჟუჟუნაძე.

ტატალაშვილისა და ზედგინიძის საქმისგან განსხვავებით, უკვე გარკვეულია, ის რომ კაჭკაჭიშვილი ახალციხის რაიონული სასამართლოს გადაწყვეტილებას აუცილებლად გაასაჩივრებს.

კაჭკაჭიშვილი „სამხრეთის კარიბჭესთან“ კომენტარს არ აკეთებს, მისი მეუღლე ადიგენის მაჟორიტარი დეპუტატი „ნაციონალური მოძრაობიდან“ ზურაბ ჩილინგარაშვილი კი ამბობს, რომ „დღეს მთელი სასამართლო ზურაბ ჩილინგარაშვილის წინააღმდეგაა, არც იცის გასაჩივრებას აზრი აქვს თუ არა.

[თამუნა უჩიძე, ახალციხე]