ეკონომიკის სამსახურის უფროსმა ახალციხის გამგეობას სასამართლოში უჩივლა

ზედგინიძე მის მიმართ გამოცხადებული საყვედურის გაუქმებას და კუთვნილი პრემიის დარიცხვას ითხოვს.

ზედგინიძეს, ეკონომიკისა და ინფრასტრუქტურის სამსახურის 3 თანამშრომელთან ერთად, საყვედური დეკემბერში გამოუცხადეს. ამბობს, რომ საყვედური 26 დეკემბერს მიიღო, თუმცა ამის შესახებ წერილობით 31 დეკემბერს აცნობეს, მანამდე აღნიშნულის შესახებ არაფერი იცოდა.

„31 დეკემბერს ჩამბარდა და ხელიც მოვაწერე, ხელფასი კი მანამდე, 27-28-ში ჩაირიცხა და ისე როგორც სხვა თანამშრომლებმა, მე პრემია ვერ მივიღე. მიზეზი არ ვიცოდი, თან ამასობაში კონკურსიც გავიარე, - ამბობს ზედგინძე და ამატებს, რომ საყვედურის შესახებ საჩივარი სასამარლოში კანონით დადგენილ ვადაში შეიტანა, - ამის შესახებ გამგეობაში ჯერ არ იციან და ამ დრომდე არც სასამართლო პროცესი ჩანიშნულა“.

ზედგინიძეს საჯარო მოხელეთა შესარჩევ კონკურსში საბუთები ეკონომიკისა და ინფრასტრუქტურის სამსახურის უფროსის პოსტზე ჰქონდა შეტანილი. თუმცა, როგორც დღეს, 4 თებერვალს გაირკვა, მას კომისიამ უარი უთხრა და მის ადგილზე გიორგი გიქოშვილი, ახალციხის მუნიციპალიტეტის გამგებლის ყოფილი მოადგილე დაინიშნა.

ზედგინძის თქმით, როგორც ოქმში წერია, მას უარი სწორედ მიღებული საყვედურის გამო ეთქვა: „ოქმში პირდაპირ არის ჩაწერილი, რომ თენგიზ ზედგინიძეს 2 საყვედური აქვს და ამის გამო არ ინიშნება. გიქოშვილს კი კარგი ხელმძღვანელის უნარები გააჩნია და აღნიშნულ თანამდებობაზე ამიტომ დაინიშნა“.

ეკონომიკის სამსახურის უფროსი ამბობს, რომ მისი ცოდნით კომისია არ დაინტერესებულა: „არაფერი უკითხავთ. მხოლოდ ერთმა ასპინძელმა ქალბატონმა მკითხა რა განათლება მქონდა. ვუპასუხე, რომ სპეციალობით ეკონომისტი და იურისტი ვიყავი. მაშინ, როცა ჩემი სივი წინ ედო და ამის შესახებ თავადაც კარგად იცოდა. ეს იყო და ეს, მითხრეს თავისუფალი ხარო. ამიტომ ვერ ვხვდები ჩემი ცოდნის დონე როგორ შეამოწმეს“.

რაც შეეხება მეორე საყვედურს, როგორც ზედგინიძე ამბობს ის, დეკემბრამდე ახალციხის მუნიციპალიტეტის გამგეობის ადმისნიტრაციული სამსახურის უფროსთან მაკა სამსონიძესთან ერთად მიიღო: „არც მაშინ და არც დეკემბერში მიზეზი და არგუმენტი თუ რატომ გამომიცხადეს საყვედურები, არ ვიცი. „მე ასე მინდა“ - აი ეს იყო საფუძველი. პირველი საყვედური, მას შედეგ რაც გაიგეს, რომ გასაჩივრებას ვაპირებდი, მომხისნეს, მეორე კი, როგორც გითხარით, უკვე გავასაჩივრე“.

„ვიცოდით, რომ სასამართლოში შეიტანდა საჩივარს და საყვედური ამიტომ მოვუხსენით?! როგორ გეკადრებათ! რაღაც დროის გასვლის შემდეგ შენიშვნები გამოასწორა, ის საკთხები მოგვარდა და საყვედური ამიტომ მოეხსნა“, - აცხადებს ახალციხის მუინიციპალიტეტის გამგებლის მოვალეობის შემსრულებელი ბესიკ ბლიაძე.

რაც შეეხება, იმას, რომ ზედგინიძემ მიღებული საყვედურების შესახებ არ იცოდა, ამბობს: „რას ნიშნავს არ იცის?! მაშინ რატომ არ გააპროტესტა, საყვედური როცა მიიღო?! ზედგინიძემაც და სამსონიძემაც გამოცხადებული საყვედურის მიზეზი კარგად იციან. მაშინ ორივე სამსახურის უფროსმა თათბირზე ისეთი საკითხები დასვეს და დაიწყეს კამათი, რაც თათბირისა და გამგებლის ჩარევის გარეშე თავად უნდა მოეგვარებინათ და საქმე არ გაეფუჭებინათ“.

მეორე საყვედური კი თანამშრომლებთან ერთად იმიტომ მიიღო ზედგინიძემ, რომ ახალციხის მუნიციპალიტეტის საბავშვო ბაღებში სარემონტო სამუშაოები სათანადოდ ვერ განახორციელა: „ჩვენთან მოდიოდნენ და ამბობდნენ, რომ ყველაფერი კარგად იყო, ახლა დავბრუნდით ბაღებიდან და იქ ბევრი რამ ხარვეზებითაა გაკეთებული“.

რას გადაწყვეტს სასამართლო ზედგინიძის საჩივართან დაკავშირებით, მომვალი გვიჩვენებს, მანამდე კი იგი კონკურსში მისი განაცხადის დაუკმაყოფილებლობის გამო მეორე საჩივარს დაწერს და მას ჯერ საპრეტენზიო კომისიაში შეიტანს: „საპრეტენზიო კომისიის ნაკლებად მჯერა. ყველაფერს რომ თავი დავანებოთ, მისი ერთ-ერთი წევრი ნუგზარ თამარაშვილი, გიორგი გიქოშვილის ბიძაა“.

[თამუნა უჩიძე, ახალციხე]