ახალციხის გამგეობის ყოფილი თანამშრომელი საკრებულოს წინააღმდეგ სასამართლოში იბრძვის

8 აპრილს, ახალციხის რაიონულ სასამართლოში, ახალციხის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილი უფროსის თენგიზ ზედგინიძის სამოქალაქო ადმინისტრაციული სარჩელი განიხილეს.

ზედგინიძე ახალციხის მუნიციპალიტეტის საკრებულოს მიერ მის მიმართ გამოცხადებული საყვედურის გაუქმებას და კუთვნილი პრემიის დარიცხვას ითხოვს. ზედგინიძეს, ეკონომიკისა და ინფრასტრუქტურის სამსახურის 3 თანამშრომელთან ერთად, საყვედური 2013 წლის დეკემბერში, ახალციხის მუნიციპალიტეტის ბაღებში ხარვეზებით ჩატარებული სარემონტო სამუშაოების გამო გამოუცხადეს. ამავე მიზეზით მას საახალწლო პრემია არ დაურიცხეს.

სასამართლოს სხდომა დაახლოებით ნახევარ საათს გაგრძელდა. პროცესზე თენგიზ ზედგინიძემ ვერ უზრუნველყო იმ მოწმეების მიყვანა, რომლებიც ამჟამად ახალციხის მუნიციპალიტეტის გამგეობაში მუშაობენ. ზედგინიძის განმარტებით „მათ თავიანთი ზემდგომების ეშინიათ და ამიტომ არცერთი მათგანი ჩვენების მისაცემად არ მივა“.

როგორც თენგიზ ზედგინიძემ აღნიშნა, მოწმეებმა პროცესზე მიუსვლელობის მიზეზად ის დაასახელეს, რომ სასამართლოდან ოფიციალური მოწვევა არ მიუღიათ. მოსამართლე გიორგი ლონდარიძემ კი განმარტა, რომ იგი მოწმეებს სასამართლო მოწვევებს იმ შემთხვევაში გაუგზავნიდა, თუ წინა სხდომაზე თენგიზ ზედგინიძე სასამართლოს ამის შესახებ აცნობებდა. მსგავსი შუამდგომლობით მოსარჩელეს მოსამართლისთვის არ მიუმართავს.

აღნიშნულ საქმეზე გადაწყვეტილებას, სასამართლო 11 აპრილს 2 საათზე გამოაცხადებს.

[თამუნა უჩიძე, ახალციხე]