რას საყვედურობს ოლეგ სანდროშვილი ეკონომიკის სამსახურის თანამშრომლებს?

ახალციხის მუნიციპალიტეტის გამგეობის ეკონომიკისა და ინფრასტრუქტურის განვითარების სამსახურში სამუშაოს არაჯეროვნად შესრულებისთვის ოთხ თანამშრომელს საყვედური გამოუცხადეს. N1, N5 და N6 საბავშვო ბაღებში სარემონტო სამუშაობის დაუსრულებლობის გამო კი სამი მშენებელი ფირმა დააჯარიმეს.

„მშენებელი ფირმები დარჩენილი სამუშაოს ღირებულებიდან ყოველ გადაცილებულ დღეზე 3 პროცენტით დავაჯარიმეთ. ჩვენ თანამშრომლებს კი ამ სარემონტო სამუშაოებისთვის მეტი ყურადღება უნდა მიექციათ, რომ ასე არ მომხდარიყო“, - ამბობს ახალციხის მუნიციპალიტეტის საკრებულოს თავმჯდომარე ოლეგ სანდროშვილი.

მისი თქმით, გარდა იმისა, რომ სამუშაობი ვერ დასრულდა, პრობლემები შეიქმნა იქ, სადაც სამუშაოების ნაწილი დასრულდა, გათბობის სისტემა გასკდა და იატაკი აიყარა.

„ჩვენი მოთხოვნა იყო, რომ მაქსიმალურად ხარისხიანად შესრულებულიყო ეს პროექტები. რადგან ეს ვერ მოხერხდა, მივიღეთ ზომები იმ თანამშრომლების მიმართ, რომელთა ბრალეულობაც გამოიკვეთა“, - აცხადებს სანდროშვილი.

მისი თქმით, სწორედ ამიტომ, შესაძლოა ეკონომიკისა და ინფრასტრუქტურის სამსახურში სტრქუტურული ცვლილებები განხორციელდეს: „გვინდა, რომ ეს სამსახური მოვაძლიეროთ სპეციალისტებით, რადგან ამ მიმართულებით ნამდვილად გვაკლია პროფესიონალები. ამ სამსახურში ბევრი საქმის მცოდნე თანამშრომელიცაა და მათ, რა თქმა უნდა შევინარჩუნებთ“.

[თამუნა უჩიძე, ახლაციხე]