სასამართლომ ადიგენის საკრებულოს ყოფილი თავმჯდომარის სარჩელი დააკმაყოფილა

ახალციხის რაიონული სასამართლოს გადაწყვეტილებით, ადიგენის მუნიციპალიტეტის საკრებულოს ყოფილი თავმჯდომარის ლევან ლობჯანიძის სარჩელი დაკმაყოფილდა. კერძოდ, სასამართლომ ბათილად ცნო ლობჯანიძის თანამდებობიდან გადაყენების შესახებ საკრებულოს მიერ მიღებული გადაწყვეტილება და დააკმაყოფილა ლობჯანიძის მოთხოვნა თანამდებობაზე აღდგენის შესახებ. გარდა ამისა, ბათილად იქნა ცნობილი ახალი თავმჯდომარის იმედა მღებრიშვილის არჩევის შესახებ საკრებულოს მიერ მიღებული გადაწყვეტილებაც. ასევე, მოსამართლე მარიკა ჩიტაშვილის გადაწყვეტილებით ადიგენის მუნიციპალიტეტის საკრებულომ ლევან ლობჯანიძეს განაცდური საათების ყოველთვიური საფასური უნდა გადაუხადოს.

"რა თქმა უნდა კმაყოფილი ვარ, რადგან ჩემი სარჩელი დაკმაყოფილდა სრულად", – ამბობს ლევან ლობჯანიძე.

როგორც მოსამართლე მარიკა ჩიტაშვილმა გადაწყვეტილების გამოცხადების შემდეგ განმარტა, სამქეში მთავარი დარღვევა საკრებულოს სხდომის დღის წესრიგის შეცვლა და კენჭისყრის პროცედურის ფარულობის დარღვევა იყო.

სასამართლო სხდომას არ დასწრებია მოპასუხე მახრე, თუმცა ადიგენის მუნიციპალიტეტის გამგეობის იურისტი და საკრებულოს თავმჯდომარე იმედა მღებრიშვილი სასამართლოს შენობაში იმყყოფებოდნენ. მათი თქმით, ისინი ზუსტად 10:30 წუთზე გამოცხადდნენ, როცა სხდომა იყო ჩანიშნული. თუმცა, სხდომა უკვე დაწყებული დახვდათ.

"ჩვენ ვიცოდით, რომ 10:30 წუთზე იწყებოდა და ამ დროს მოვედით, მაგრამ ალბათ ერთი წუთით ადრე დაიწყო", – განაცხადა გამგეობის იურისტმა.

მოსარჩელე მხარეს იმედი აქვს, რომ ადიგენის მუნიციპალიტეტის წარმომადგენლები აღნიშნულ გადაწყვეტილებას არ გაასაჩივრებენ. თუმცა, თავად ადიგენის მუნიციპალიტეტის გამგეობის იურისტი შავლეგ ტყემალაძე ამბობს, რომ გადაწყვეტილება აუცილებლად გასაჩივრდება.

"უახლოეს დროში, როგორც კი ჩაგვბარდება გადაწყვეტილება აუცილებლად გავასაჩივრებთ", – ამბობს შავლეგ ტყემალაძე.

შეგახსენებთ, რომ მიმდინარე წლის 4 მარტს, ადიგენის მუნიციპალიტეტის საკრებულოს სხდომაზე, 17 ხმით 10–ის წინააღმდეგ, დეპუტატებმა ფარული კენჭისყრით საკრებულოს თავმჯდომარე ლევან ლობჯანიძე თანამდებობიდან გადააყენეს.

[თამარ თოთაძე, ახალციხე]