ახალციხის გამგეობიდან საჯარო ინფორმაციას „სამხრეთის კარიბჭე“ მე-19 დღეა ელოდება

ახალციხის მუნიციპალიტეტის გამგეობაში „სამხრეთის კარიბჭეს“ მიერ გაგზავნილი ოფიციალური წერილიდან დღეს, 7 თებერვალს, მე-19 დღე შესრულდა. მოთხოვნილი საჯარო ინფორმაცია ამ დრომდე არ მიგვიღია.

„სამხრეთის კარიბჭე“ ახალციხის სკოლამდელი აღზრდის დაწესებულებებში ჩატარებული სარემონტო სამუშაოების შესახებ ითხოვდა ინფორმაციას. კითხვები, აღნიშნული სამუშაოების არასათანადოდ შესრულების გამო დაჯარიმებულ ფირმებსა და იმ თანამშრომლებს ეხებოდათ, რომლებმაც ამის გამო საყვედურები მიიღეს.

6 თებერვალს, ახალციხის მუნიციპალიტეტის გამგეობაში განგვიმარტეს, რომ წერილი ახალციხის მუნიციპალიტეტის გამგეობის ეკონომიკისა და ინფრასტრუქტურის სამსახურის უფროსს თენგიზ ზედგინიძესა და ახალციხის მუნიციპალიტეტის გამგეობის იურიდიული სამსახურის უფროსს ავთანდილ თელიაშვილს დაეწერა, თუმცა, ამ დროისთვის არცერთი მათგანი გამგეობაში აღარ მუშაობს.

ახალციხის მუნიციპალიტეტის გამგეობის ადმინისტრაციული სამსახურის უფროსი მაკა სამსონიძე დაგვპირდა, რომ წერილზე პასუხს მაქსიმუმ 2 დღეში მივიღებთ: „ამ დროისთვის არც ზედგინიძე და არც თელიაშვილი გამგეობაში აღარ მუშაობენ. ამიტომ, პირადად გავაკონტროლებ, რომ წერილზე პასუხი დროულად მიიღოთ“.

[თამუნა უჩიძე, ახალციხე]