ვინ არის ინგა ვარდიძე

ინგა ვარდიძე 1974 წლის 12 მაისს ადიგენის მუნიციპალიტეტში, დაბა ადიგენში დაიბადა. საშუალო განათლება ამავე, დაბა ადიგენის სკოლაში მიიღო.

1991 -96 წლებში ივ. ჯავახიშვილის სახელობის თბილისის სახელმწიფო უნივერსიტეტის მესხეთის ფილიალში, დაწყებითი განათლების ფაკულტეტზე სწავლობდა.

უნივერსიტეტის დამთავრების შემდეგ, 1991 წელს დაბა ადიგენის ბაგა-ბაღში, აღმზრდელად დაიწყო მუშაობა.

1993 წლიდან 2014 წლის 12 მარტამდე ადიგენის მუნიციპალიტეტის სოფელ არლის საჯარო სკოლაში, დაწყებითი კლასების მასწავლებლად მუშაობდა.

ჰყავს მეუღლე და ორი შვილი.

ინგა ვარდიძეს CV-ში უწერია, რომ მუშაობის განმავლობაში მიღებული აქვს რამდენიმე მადლობა: 1998-1999 წელს, როგორც წლის საუკეთესო მასწავლებელს; 2001 წელს - მოსწავლეთა სწავლა-აღზრდის საქმეში გამოჩენილი გულისხმიერებისთვის; 2003 წელს - რაიონში ჩატარებულ ღონისძიებაში „მღერიან და ხუმრობენ მასწავლებლები“ მონაწილეობისთვის; 2004 წელს - მათემატიკური ღონისძიების მაღალ დონეზე ჩატარებისთვის; 2007 წელს - სიყვარულის დღისადმი მიძღვნილი ღონისძიების მაღალ დონეზე ჩატარებისთვის.

2005 წელს დასახელებულია ადიგენის რაიონში კლასის საუკეთესო ხელმძღვანელად; 2008-2009 წლებში I საფეხურის საუკეთესო მასწავლებლად; 2010 წელს კათედრის საუკეთესო ხელმძღვანელად.

არის ირმის ნახტომის მიერ გამოცხადებული კონკურსის „ჩემი გარემო“ გამარჯვებული 2009 წელს.

გარდა ამისა, 2009 წლიდან 2013 წლამდე ყველა სასწავლო წელს დასახელებულია საუკეთესო მასწავლებლად.

ვისგან იღებდა მადლობებს და ეს დამსახურებები და წოდებები მხოლოდ არლის სკოლის ფარგლებში ქონდა, თუ მუნიციპალიტეტის, CV-ის მიხედვით არ ირკვევა. ინგა ვარდიძე კი მოუცლელობის მიზეზით ამ ეტაპზე კომენტარს არ აკეთებს.

გარდა საგანმანათლებლო საქმიანობისა, ინგა ვარდიძე მუშაობს ადიგენის მუნიციპალიტეტის გამგეობაშიც. 2010 წლიდან იგი ადიგენის მუნიციპალიტეტის საკრებულოს წევრია.

როგორც ადიგენის მუნიციპალიტეტის საკრებულოს თავმჯდომარე გივი ენდელაძე განმარტავს, 2012 წლის საპარლამენტო არჩევნების შემდეგ, ვარდიძე ფრაქციის „ქართული ოცნება - რესპუბლიკელების“ წევრი გახდა, მანამდე კი არცერთი ფრაქციის (არც პარტიის) წევრი არ ყოფილა.

შეგახსენებთ, 12 მარტს ინგა ვარდიძე ახალციხის მეხუთე საჯარო სკოლის დირექტორის მოვალეობის შემსრულებლად დაინიშნა. მის დანიშვნას პედაგოგები აპროტესტებენ და ამ პოსტზე ნანა დათაშვილის დანიშვნას მოითხოვენ, რომელიც დირექტორის მოვალეობას 11 თვის განმავლობაში, 2013 წლის მაისიდან ასრულებდა.

[ნინო ნარიმანიშვილი, თინათინ ზაზაძე, ახალციხე]