რა შეიძლება გაკეთდეს ნარკომანიის თავიდან ასაცილებლად

შეხვედრა ასოციაცია „ტოლერანტის“ ორგანიზებით მოეწყო და მას არასამთავრობო სექტორის წარმომადგენლები, სტუდენტები, მოსწავლეები, იურისტები და სასულიერო პირები ესწრებოდნენ. „ახალციხის დემოკრატიული ჩართულობის ცენტრში“ გამართულ შეხვედრაზე ისაუბრეს, როგორ შეიძლება შემცირდეს ნარკომანიის გავრცელება ახალგაზრდებში.

"ბოლო პერიოდში წინ წამოიწია ნარკომანიის დეკრიმინალიზაციის საკითხებმა. ადამიანი რომელიც ნარკოტიკის მომხმარებელია, საზოგადოებამ უნდა გადაარჩინოს, მხოლოდ კანონის გამკაცრება ამას არ უშველის“, - ამბობს ასოციაცია „ტოლერანტის“ ხელმძღვანელი ცირა მესხიშვილი.

როგორც სტუდენტებმა და მოსწავლეებმა შეხვედრაზე აღნიშნეს, პრევენციის მიზნით ახალგაზრდებისთვის სხვადასხვა შეხვედრები უნდა მოეწყოს, რაც ხელს შეუწყობს მათ ინფორმირებულობას. მათი თქმით, სამართალდამცავი ორგანოების მხრიდან სკოლებში თვეში ერთხელ ჩატარებული შეხვედრები საკმარისი არ არის იმისთვის, რომ ახალგაზრდებმა ამ პრობლემაზე იფიქრონ.

„სამცხე-ჯავახეთში ნარკოტიკებთან დაკავშირებული პრობლემები ნაკლებად არსებობს, თუმცა აუცილებელია თავიდანვე მოხდეს ამ პრობლემის აღმოფხვრა“, - ამბობს სამცხე-ჯავახეთის სახელმწიფო უნივერსიტეტის სტუდენტი გიორგი ცუხიშვილი.

შეხვედრის მონაწილეებმა რეკომენდაციებიც შეიმუშავეს, რა გზებით უნდა ებრძოლოს საზოგადოება ნარკომანიას.

„თვითმმართველობას ვთხოვოთ გამოძებნოს საინტერესო გზა ნარკომანიის წინაღმდეგ ბრძოლისთვის, იქნებ დაფიქრდნენ, რა შეიძლება გაკეთდეს, რომ ახალგაზრდობა ჩაებას სპორტში და არ დაკავდეს სხვა საქმიანობით. გარდა ამისა, ჩვენ ვფიქრობთ, რომ ისევ თვითმმართველობას ვთხოვოთ პატარ-პატარა სოციალური პროგრამები დააფინანსოს, რომელსაც გარკვეული შედეგი ექნება. ასევე გვაქვს რეკომენდაცია, რომ სკოლებში არსებობდნენ ისეთი ადამიანები, მაგალითად ფსიქოლოგები, რომელბსაც თითოეულ ბავშვთან ექნებათ კონტაქტი და ესაუბრებიან ნარკომანიაზე, დანაშაულზე“, - ამბობს ასოციაცია „ტოლერანტის“ წარმომადგენელი გოჩა ნათენაძე.

შეხვედრა პროექტ „ყოფილი პატიმრების საზოგადოებაში ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში“ ფარგლებში გაიმართა. აღნიშნული პროექტი ორწლიანია და 2014 წლის ივნისში დასრულდება.

[თამარ თოთაძე, ახალციხე]