ახალციხეში ამნისტიაზე იმსჯელეს

ამნისტიისა და პრობაციონერების რესოციალიზაციის თემაზე ახალციხელმა ახალგაზრდებმა დღეს ”დემოკრატიული ჩართულობის ცენტრში იმსჯელეს. შეხვედრა სამცხე-ჯავახეთის ასოციაცია “ტოლერანტის” ორგანიზებით მოეწყო.

დისკუსიას სამცხე-ჯავახეთის სახელმწიფო სასწავლო უნივერსიტეტის აკადემიური პერსონალი, სტუდენტები, იურისტები და სკოლის მოსწავლეები ესწრებოდნენ. შეხვედრის მონაწილეებმა, 2012 წლის 28 დეკემბერს საქართველოს პარლამენტის მიერ მიღებული ამნისტიის კანონის შესახებაც ისაუბრეს.

”გადავწყვიტეთ, რომ უახლოესი ამნისტიის მიზანშეწონილობის შესახებ გვემსჯელა, რომელიც 2012 წელს ათასობით პატიმარს შეეხო. ასეთი სახის ამნისტიამ მოსახლეობაში აზრთა სხვადასხვაობა გამოიწვია”-ამბობს პროექტის ”პირობითი მსჯავრდებული (პრობაციონერი) ახალგაზრდების რესოციალიზაციის ხელშეწყობა სამცხე-ჯავახეთში” იურისტი დავით თელიაშვილი.

დისკუსიისას ახალგაზრდებმა აღნიშნეს, რომ ამნისტია არ უნდა შეხებოდა 139-ე მუხლით დაპატიმრებულებს (არასრულწლოვნებზე ძალადობა).

”მიმაჩნია, რომ ასეთი სახის დისკუსიები ხშირად უნდა იმართებოდეს”, - გვითხრა შეხვედრის დასასრულს იურიდიული სპეციალობის მეოთხე კურსის სტუდენტმა მარიამ სულაბერიძემ.

დისკუსია ”ტოლერანტის” პროექტის ”პირობითი მსჯავრდებული (პრობაციონერი) ახალგაზრდების რესოციალიზაციის ხელშეწყობა სამცხე-ჯავახეთში” ფარგლებში მოეწყო.

[ნუკა სტეფნაძე, ახალციხე]