"ტოლერანტი” ყოფილი პატიმრების გადამზადებას იწყებს

სამცხე-ჯავახეთის რეგიონული ასოციაცია ”ტოლერანტი” ახალი პროექტს იწყებს, რომლის მიზანი ყოფილი პატიმრებისთვის სოციალურ-ფსიქოლოგიური დახმარების გაწევაა. პროექტის განხროციელება, სახელწოდებით - ”ყოფილი პატიმრების საზოგადოებაში ინტეგრაციისა და რეაბილიტაციის ხელშეწყობა-სამცხე ჯავახეთში” ”ტოლერანტმა” 2012 წლის დეკემბერში დაიწყო, ოფიციალური პრეზენტაცია კი დღეს, ახალციხის ”დემოკრატიული ჩართულობის ცენტრში” გამართა.

ასოციაციაში ამბობენ, რომ პროექტი მთელს სამცხე-ჯავახეთს მოიცავს. რეგიონის მასშტაბით 300 პატიმარი სოციალურ, ფსიქოლოგიურ, სამედიცინო და იურიდიულ დახმარებას მიიღებს.

- ”რეგიონში მცხოვრებ ყოფილ პატიმართა შორის შეიქმნება ოთხი სასწავლო ჯგუფი. 35 მათგანი გადამზადდება, შემდეგ კი სურვილისამებრ დასაქმდება”, - განმარტავს ასოციაცია ”ტოლერანტის” თავმჯდომარე ცირა მესხიშვილი.

ამ ეტაპზე ორგანიზაციას მხოლოდ 102 ყოფილი პატიმრის მონაცემი აქვს.

მესხიშვილის თქმით, პროექტის მიზანი არამხოლოდ ყოფილი პატიმართა რესოციალიზაცია, არამედ მათი ოჯახების დახმარებაცაა.

”ჩვენ შევეცდებით ამ ოჯახებს გავუწიოთ ფსიქოლოგიური დახმარება, რათა მათ თავიანთი ოჯახის წევრები მიიღონ ისეთები, როგორებიც არიან”, -განაცხადა ცირა მესხიშვილმა.

დღეს გამართულ პრეზენტაციას არასამთავრობო ორგანიზაციები, თვითმმართველობის, ძალოვანი სტრუქტურისა და მედიის წარმომადგენლები ესწრებოდნენ.

პროექტი ევროკავშირის მიერაა დაფინანსებული. პარტნიორი ორგანიზაციები არიან ორგანიზაციათა კავშირი ”ფაროსი” და სასჯელაღსრულების დეპარტამენტი. პროექტი წელიწადნახევრის განმავლობაში გაგრძელდება.

[ნინო ბერიძე, ახალციხე]