ახალციხეში ყოფილი პატიმრების ნამუშევრების გამოფენა-გაყიდვა გაიმართება

გამოფენა-გაყიდვა სამცხე-ჯავახეთის რეგიონული ასოციაცია "ტოლერანტის" ორგანიზებით ეწყობა. გამოფენაზე წარმოდგენილი ნამუშევრების გაყიდვით მიღებული თანხა ყოფილი პატიმრების სწავლებასა და ახალი ნამუშევრების შექმნას მოხმარდება.

„ტოლერანტის“ თავმჯდომარე ცირა მესხიშვილი ამბობს, რომ გამოფენის მიზანი ყოფილი პატიმრების გაზრდილი მოტივაციის წარმოჩენაა: "ამ გამოფენით ისინი უკეთ შეძლებენ თვითრეალიზაციას და საზოგადოებრივ პროცესებში აქტიურად ჩაერთვებიან".

გამოფენა-გაყიდვა ევროკავშირის მიერ დაფინასებული პროექტის, "ყოფილი პატიმრების საზოგადოებაში ინტეგრაციისა და რეაბილიტაციის ხელშეწყობა სამცხე-ჯავახეთის რეგიონში“, ფარგლებში ტარდება.

ღონისძიებას სასჯელაღსრულების, პრობაციისა და იურიდიული დახმარების საკითხთა სამინისტროს, ევროკავშირის, საერთაშორისო ორგანიზაციების, ფონდებისა და მედიის წარმომადგენლები დაესწრებიან.

[sknews.ge]