ახალციხეში 1944 წლის ნოემბერი გაიხსენეს

მაჰმადიან მესხთა 69-ე წლისთავისადმი მიძღვნილი ღონისძიება ახალციხის „დემოკრატიული ჩართულობის ცენტრში“ ასოციაცია „ტოლერანტის“ ორგანიზებით მოეწყო. ღონისძიებას ადგილობრივი თვითმმართველობის და არასამთავრობო ორგანიზაციების წარმომადგენლები, სამოქალაქო განათლების პედაგოგები და კლუბის წევრები, ასევე ახალციხის მუნიციპალიტეტში მცხოვრები მაჰმადიანი მესხები ესწრებოდნენ.

„ჩვენ, როგორც არასამთავრობო და უფლებადამცველ ორგანიზაციას არ გვქონდა მორალური უფლება, რომ დღევანდელი დღე არ აღგვენიშნა. საზოგადოებამ კიდევ ერთხელ უნდა გაიხსენოს ის ანტიჰუმანური აქტი, რომელიც 1944 წელს მოხდა. როცა ადამიანი კარგავს სამშობლოს, ენას და იდენტობას, ამაზე დიდი ტრაგედია არ არსებობს“, - ამბობს სამცხე-ჯავახეთის რეგიონული ასოციაცია „ტოლერანტის“ თავმჯდომარე ცირა მესხიშვილი.

ღონისძიება ევროკავშირის მიერ დაფინანსებული პროექტის „დეპორტირებულთა ჰუმანიტარული დახმარება, თვითრეპატრიაციის პრევენცია“, ფარგლებში გადაღებული ფილმის „სამშობლო, რომელიც შორია“ ჩვენებით დაიწყო. ფილმის ჩვენების შემდეგ კი დისკუსია გაიმართა. სტუმრებს საშუალება ჰქონდათ მაჰმადიანი მესხების ყოველდღიური ცხოვრების ამსახველი ფოტო გამოფენაც დაეთვალიერებინათ.

[მანანა სარაშვილი, ახალციხე]