ახალციხის გამგებელმა რწმუნებულებს სოფლის კრებები დაუწუნა

ახალციხის მუნიციპალიტეტის გამგებელმა ზაზა მელიქიძემ გამგეობის თათბირზე, რომელიც დღეს, 17 მარტს ჩატარდა, სოფლებში გამგებლის წარმომადგენლების ნაწილს „სოფლის მხარდაჭერის პროგრამის“ ფარგლებში ჩატარებული კრებები დაუწუნა და აღნიშნა, რომ კრებას მოსახლეობა არ ესწრებოდა.

„შეხვედრები დაიგეგმა სამუშაო საათებში და მოსახლეობის ნაწილი არ ესწრებოდა. ამიტომ ჩვენ ვთხოვეთ რწმუნებულებს, მოსახლეობასთან ითანამშრომლონ და შეარჩიონ ისეთი დრო, რომელიც მათთვისაც ხელსაყრელი იქნება. პრიორიტეტის შერჩევის დროს ჩვენთვის მნიშვნელოვანია მოსახლეობის უმრავლესობის აზრი“, – ამბობს ახალციხის მუნიციპალიტეტის გამგებელი ზაზა მელიქიძე.

„სოფლის მხარდაჭერის პროგრამის“ ფარგლებში ახალციხის მუნიციპალიტეტში 650 ათასი ლარი გამოიყო, რომელიც თითოეულ სოფელზე მოსახლეობის რაოდენობის მიხედვით გადანაწილდება.



„მუნიციპალიტეტის უმეტეს სოფლებში ჩავატარეთ კრება, მაგრამ არის სოფლები, სადაც ჯერ არ შეურჩევიათ პრიორიტეტი და ჩამოყალიბების პროცესში არიან. ამ სოფლებში მეორედ ჩავატარებთ კრებას“, – ამბობს ახალციხის მუნიციპალიტეტის ინფრასტრუქტურის სამსახურის უფროსი ნოდარ ბალახაშვილი.

მისივე თქმით, „სოფლის მხარდაჭერის პროგრამის“ ფარგლებში დასახელებული პრიორიტეტები წელსაც უცვლელია. მოსახლეობა სასმელი წყლის როგორც ხარისხის, ასევე რაოდენობის გაუმჯობესებას ითხოვს.

„ასევეა გზების მოხრეშვაც, მაგრამ მოგეხსენებათ, რომ მცირე თანხებია და ვცდილობთ, რომ გზები ჩვენი თანხებით გავაკეთოთ. პრიორიტეტებში გამოიკვეთა კლუბებისა და საბავშვო ბაღების რეაბილიტაცია“, – ამბობს ბალახაშვილი.

მიუხედავად იმისა, რომ ზოგიერთ სოფელში კრება მეორედ უნდა ჩატარდეს, ახალციხის მუნიციპალიტეტის გამგეობაში განმარტავენ, რომ პრიორიტეტებს დროულად შეარჩევენ.

„ვადა განსაზღვრული არ არის, მაგრამ ჩვენ დაინტერესებული ვართ, რომ მოსახლეობამ დროულად შეარჩიოს პრიორიტეტები, სწრაფად დამთავრდეს პროცედურები. პრიორიტეტების შესწავლის შემდეგ უკვე მიდის საპროექტო სამუშაოები, მშენებელი კომპანიების შერჩევა და არ გვინდა, რომ ეს პროცედურა ძალიან გაიწელოს“, – განმარტავს გამგებელი.



[თამარ თოთაძე, ახალციხე]