რას ამბობენ ბრალდების მხარის მოწმეები ადიგენის გამგებლის საქმეზე

26 ნოემბერს ადიგენის მუნიციპალიტეტის ყოფილი გამგებლის სიმონ პარუნაშვილის სასამართლო პროცესზე ბრალდების მხარის ოთხი მოწმე დაიკითხა. ოთხივე მათგანი ადიგენის მუნიციპალიტეტის გამგეობის ინსპექტირების ჯგუფის წევრები იყვნენ: მაკა მაჭარაშვილი, ბადრი თათოშვილი, გურამ ბოჩიკაშვილი და დავით ნამგლაძე. ოთხივე მათგანი ბრალდებისა და დაცვის მხარის შეკითხვებს შპს „ნამქერის“ მიერ შესრულებულ სამუშაოსთან დაკავშირებით პასუხობდა.

შეგახსენებთ, რომ „ნამქერის“ საქმე 2012 წლის 7 ივნისს ჩატარებულ ტენდერს ეხება, რომლის მიხედვითაც დაბა ადიგენსა და 7 სოფელში გარე განათება გაკეთდა. ამისთვის აღნიშნულ კომპანიას 54 700 ლარამდე გადაერიცხა. ბრალდების მხარის მტკიცებით, „ნამქერს“ ბოძების რაოდენობა შეცდომით, 49-ის ნაცვლად 149 ჰქონდა დაფიქსირებული. ასევე „ნამქერმა“ გარე განათებისთვის არა თუ ახალი, არამედ მეორადი ბოძები გამოიყენა. ბრალდების მხარის მტკიცებულებებშივე გამოირკვა, რომ გამგეობაში ხარჯთაღრიცხვის დოკუმენტი მოგვიანებით შეცვალეს.

ინსპექტირების ჯგუფის წევრები, რომლებსაც შესრულებული სამუშაოს ჩაბარება და შესაბამისი დასკვნის დაწერა ევალებათ, აცხადებენ, რომ ხარჯთაღრიცხვა და ფორმა 2, რომელსაც დასკვნის დაწერისას ერთმანეთს ადარებენ, შესაბამისობაში მოდიოდა. მეორე ხარჯთაღრიცხვის არსებობის შესახებ კი მათ მას შემდეგ შეიტყვეს, რაც აღნიშნულ საქმეზე გამოძიება დაიწყო.

მოწმეების განცხადებით, მათ ვერც ის შენიშნეს დასრულებული სამუშაოს შემოწმებისას, რომ განათება მეორადი ბოძებით იყო გაკეთებული.
„როცა მივედით, ბოძები ახალი გადაღებილი იყო, თან ბევრჯერ მინახავს, რომ ანტონ მერაბიშვილი (ვინც სამუშაო შეასრულა) ეზოში ახალ მილებს ადუღებდა, ამიტომ ეჭვი არ გამჩენია“, - ამბობს ერთ-ერთი მოწმე ბადრი თათოშვილი.

იგივე განაცხადა სასამართლო პროცესზე მოწმე გურამ ბოჩიკაშვილმაც. მან მოსამართლის დასმულ კითხვას, მიადგა თუ არა ამის გამო რაიმეს ზიანი, უპასუხა, რომ არა: „პირიქით, ძველი მილები გაცილებით სქელი და გამძლეა“.

„თუ ასეა, მაშინ ჩაგედოთ სატენდერო მოთხოვნაში, რომ განათება აღობილში მოჭრილი, ძველი ბოძებით გაეკეთებინათ“, - დაუბრუნა კითხვა მოსამართლემ.

„ეგ მე არ მეხება“, - უპასუხა ბოჩიკაშვილმა.

26 ნოემბერს სასამართლო პროცესი დაახლოებით 2 საათს გაგრძელდა. მომავალი სხდომა 6 დეკემბერს 13:00 საათზე ჩაინიშნა.

[თამუნა უჩიძე, ახალციხე]