ზურაბ ჩილინგარაშვილი პროკურატურას ადიგენის გამგებლის საქმის შეწყვეტას სთხოვს [Video]

მთავარი → SK TV » ვიდეო 05.02.2014

ადიგენის მაჟორიტარი დეპუტატი, საპარლამენტო უმცირესობის წევრი ზურაბ ჩილინგარაშვილი პროკურატურას ადიგენის გამგებლის სიმონ პარუნაშვილის საქმის შეწყვეტას სთხოვს, რადგან მისი აზრით, ეს პოლიტიკური დევნაა და არა სამართლებრივი.

ადიგენის მუნიციპალიტეტის გამგებლის საქმეზე მიმდინარე სასამართლო პროცესებზე ზურაბ ჩლინგარაშვილმა დღეს, 5 თებერვალს, პარლამენტის სხდომაზე ისაუბრა.

ჩილინგარაშვილი აცხადებს, რომ სიმონ პარუნაშვილი პოლიტიკური დევნის ნათელი მაგალითია. მისი მტკიცებით, ხელისუფლების შეცვლის შემდეგ პარუნაშვილს არაერთხელ მოსთხოვეს ადიგენის გამგებლის პოსტი დაეტოვებინა, რაზეც უარი განაცხადა, ამიტომ იგი დააკავეს. სასამართლო პროცესი 6 თვეა გრძელდება, დასაკითხი 20 მოწმიდან კი ჯერ მხოლოდ 8 მოწმე დაკითხეს, რაც იმას ნიშნავს, რომ განაჩენს ერთი წელიწადი დასჭირდება.

"ძალიან ვთხოვ სასამართლოს და პროკურატურას მიაქციოს ყურადღება ამას, იმიტომ, რომ ეს არის ჩვეულებრივი, ნათელი მაგალითი პოლიტიკური დევნის“, - განაცხადა ჩილინგარაშვილმა.

შეგახსენებთ, სიმონ პარუნაშვილი მიმდინარე წლის 27 აგვისტოს, ფინანსთა სამინისტროს საგამოძიებო სამსახურის საგამოძიებო დეპარტამენტის სამცხე-ჯავახეთის სამმართველომ დააკავა. მასთან ერთად სისხლის სამართლის კოდექსის 332-ე მუხლის სხვადასხვა ეპიზოდში ბრალი ედებათ ადიგენის მუნიციპალიტეტის გამგეობის საფინანსო სამსახურის ყოფილ უფროსს ჯემალ იაკობაძეს, ადიგენის მუნიციპალიტეტის გამგეობის ეკონომიკისა და ინფრასტრუქტურის სამსახურის ყოფილ მთავარ სპეციალისტს გელა აღლემაშვილსა და ადიგენის მუნიციპალიტეტის გამგებლის ყოფილ მოადგილეს რატი ტატალაშვილს. სიმონ პარუნაშვილის გარდა, დანაშაულს ყველა ბრალდებული აღიარებს.

ამავე სხდომაზე ჩილინგარაშვილმა განაცხადა რომ, ადიგენში გაზიფიცირება გაჩერებულია და ისიც გაფუჭდა, რაც გაკეთებული იყო. გამრიცხველიანება კი ნელი ტემპით მიმდინარეობს, რაც გაზაფხულზე ხე-ტყის პრობლემებს გამოიწვევს.
ჩილინგარაშვილი პენსიის საკითხსაც შეეხო და განაცხადა, რომ ინფალციის გამო პენსიონერი წლის განმავლობაში 200 ლარს დაკარგავს.

[sknews.ge]