ახალციხის ახალგაზრდულმა ცენტრმა შუალედური ანგარიში წარადგინა

შეხვედრა ახალციხის მუნიციპალიტეტის გამგეობის საკონფერენციო დარბაზში გაიმართა. "სამოქალაქო განათლებისა და პედაგოგთა გადამზადების პროგრამის" შუალედური ანგარიშის პრეზენტაცია ახალციხის ახალგაზრდული ცენტრის დირექტორმა წარადგინა. მაკა სუდაძე მოქალაქეებს ექვსი თვის განმავლობაში სამოქალაქო კლუბის მიერ მიღწეული შედეგები გააცნო.

პრეზენტაციის შემდეგ სხვადასხვა მუნიციპალიტეტის საჯარო სკოლების სამოქალაქო კლუბების წევრებმა "სამოქალაქო განათლებისა და პედაგოგთა გადამზადების პროგრამის" სხვადასხვა მიმართულებით მიღწეულ წარმატებებზე ისაუბრეს.

„ჩვენ ვიყავით ბორჯომის მუნიციპალიტეტის გამგეობაში. გვაინტერესებდა მათი მუშაობის სტრუქტურა. იქ ყოფნის დროს გამოიკვეთა სხვადასხვა პრობლემა მათ შორის ბორჯომის სასაფლაოსთან მიმასვლელი გზის პრობლემა, ჩვენი ინიციატივით მოხდა ამ გზის რებილიტაცია“,-ამბობს ბორჯომის მესამე საჯარო სკოლის სამოქალაქო კლუბის „თორის“ წევრი იზაბელა გელაშვილი.

პრეზენტაციის დასასრულს პროგრამის შუალედური ანგარიში "სამოქალაქო განათლებისა და პედაგოგთა გადამზადების პროგრამის" დირექტორმა მარინა უშვერიძემ შეაფასა.

„პროგრამის მთავარი აზრი ის არის, რომ ჩვენ არამხოლოდ თეორიულად უნდა ვასწავლოთ ბავშვებს სამოქალაქო განათლება, არამედ მათ პრაქტიკაში უნდა გამოიმუშაონ უნარ-ჩვევები. ამ ახალგაზრდებს კარგად გამოსდით პრობლემების მოგვარება, ამის მაგალითი დღეს ჩვენ ვნახეთ კიდეც“,-ამბობს მარინა უშვერიძე.

შეხვედრის დადასრულს მაკა სუდაძემ ახალციხის შპს "კეთილმოწყობის" სამსახურის უფროსს, ახალციხის საჯარო ბიბლიოთეკას, ბორჯომის მუნიციპალიტეტის სოფელ დვირის ტერიტორიული ორგანოს რწმუნებულს და ნინოწმინდის რადიო „ნორის“ ხელმძღვანელს მადლიერების ნიშნად სერთიფიკატები გადასცა.

„ამ ადამიანებმა ახალგაზრდებს მუშაობის პროცესში დიდი დახმარება გაუწიეს“,-ამბობს მაკა სუდაძე.

სერთიფიკატებით ასევე დაჯილდოვდნენ საუკეთესო საკლუბო ინიციატივების ავტორების და ყველაზე აქტიური სამოქალაქო კლუბის წევრები.



[მანანა სარაშვილი, ახალციხე]