ახალციხეში ახალგაზრდული ფესტივალი გაიმართა

ფესტივალი ამხანაგური საფეხბურთო მატჩით გაიხსნა, რომელშიც სამცხე-ჯავახეთის სამოქალაქო კლუბის 6 საფეხბურთო გუნდი მონაწილეობდა. პირველობა ახალციხის პირველმა საჯარო სკოლამ მოიპოვა და თასით დაჯილდოვდა. ბურთით და სიგელით დააჯილდოვეს მეორე ადგილზე გასული ადიგენის საჯარო სკოლის გუნდი. ასევე სიგელით დააჯილდოვეს ადიგენის სკოლის გუნდის წევრი კარგი თამაშისთვის.

პარალელურად, ქალაქის ცენტრალურ ქუჩაში რეგიონის საჯარო სკოლის მოსწავლეებმა „ახალგაზრდული მოძრავი ჯაჭვი“ შეკრეს და სამოქალაქო განათლებისა და სამოქალაქო საზოგადოების მნიშვნელობაზე საინფორმაციო ბუკლეტები დაარიგეს.

გამგეობის შენობიდან ახალგაზრდების ნაწილმა გამგეობის საკონფერენციო დარბაზში გადაინაცვლა, სადაც საკონფერენციო თემების „სამოქალაქო განათლების დაბალი დონე, არშემდგარი სამოქალაქო საზოგადოების“ პრეზენტაცია გაიმართა.

საკონფერენციო თემები რეგიონის საჯარო სკოლის მოსწავლეებმა მოამზადეს. 14 თემიდან სამი საუკეთესო შეირჩა. გამარჯვებული თემის ავტორებს: ადიგენის მუნიციპალიტეტის სოფელ არლის საჯარო სკოლის მოსწავლეს თეონა ნადირაძეს, ბორჯომის მესამე საჯარო სკოლის მოსწავლეს მარიამ ქირიას და სხვილისის საჯარო სკოლის მოსწავლეს ანა კანანიანს წიგნები: „ჩვენი ღირსებანი“ გადაეცათ.

ფესტივალი ახალციხის ცენტრალურ პარკში ფლეშმობით დასრულდა, რომელიც სხვილისისა და ბორჯომის საჯარო სკოლის სამოქალაქო კლუბის წევრებმა მოაწყეს.

ფესტივალი ახალციხის ახალგაზრდული ცენტრის „სამოქალაქო განათლებისა და პედაგოგთა გადამზადების პროგრამის“ ფარგლებში გაიმართა.

[მანანა სარაშვილი, ახალციხე]