ახალციხის ახალგაზრდულმა ცენტრმა 4– წლიანი პროგრამის ანგარიში წარადგინა

პროგრამა 2010–2014 წლებში მიმდინარეობდა. მისი მიზანი სამოქალაქო განათლების სწავლება და სწავლის ხარისხის გაუმჯობესება იყო.

პროექტის მიმდინარეობისას პედაგოგებისთვის ოთხი სახის სახელმძღვანელო გამოიცა, მასწავლებლებისთვის და სკოლის დირექტორებისთვის კი ტრენინგები ჩატარდა.

ასევე, პროგრამის ფარგლებში სამცხე–ჯავახეთის 66 სკოლაში სამოქალაქო კლუბი შეიქმნა. კლუბის წევრებისთვის კი სხვადასხვა ღონისძიებები და ტრენინგები ჩატარდა.

„პროგრამას ოთხი მიმართულება ჰქონდა, იყო მცირე გრანტების მიმართულება, სადაც ახალგაზრდებს ვასწავლეთ როგორ უნდა დაიწეროს და განხორციელდეს პროექტი. ერთი მიმართულება სოციალური მედიას ეხებოდა, მოსწავლეებმა ისწავლეს როგორ უნდა გამოიყენონ ინტერნეტ სივრცე სასარგებლოდ. გარდა ამისა გვქონდა სტაჟირების პროგრამა, რომლის საშუალებითაც ახალგაზრდებმა სხვადასხვა ორგანიზაციებში სტაჟირება გაიარეს. ერთი მიმართულება კი ნასწავლის პრაკტიკაში გამოყენებას გულისხმობდა, სადაც ვასწავლეთ როგორ დაიგეგმოს და განხორციელდეს სხვადასხვა ღონისძიებები“, – განმარტავს ახალციხის ახალგაზრდული ცენტრის დირექტორი მარინე სუდაძე.

„სამოქალაქო განათლებისა და პედაგოგთა გადამზადების პროგრამის“ საბოლოო ანგარიშის წარდგენა სამცხე–ჯავახეთის სახელმწიფო უნივერსიტეტის მეორე კორპუსში გაიმართა. შეხვედრას აღნიშნული პროგრამის გრანტების მენეჯერი თამარ ფრუიძე ესწრებოდა. როგორც ფრუიძემ აღნიშნა, შედეგები, რაც დღეს ახალციხის ახალგაზრდულმა ცენტრმა წარადგინა შთამბეჭდავია.

„სამოქალაქო კლუბის წევრებმა ბევრი საინტერესო ღონისძიება, პროექტი და ღონისძიება განახორციელეს, რომელიც სათემო პრობლემების მოგვარებას ეხებოდა. კონკრეტულად ისეთ საკითხებს, როგორიც არის გზების, წყალმომარაგების სისტემის მოწესრიგება, სკვერების ინფრასტრუქტურის გაუმჯობესება და ასე შემდეგ. ასევე, პროგრამის ფარგლებში მონაწილეობა მიიღეს საზაფხულო ბანაკებში, სტაჟირების პროგრამებში და ბევრ იმ მიმართულებაში, რაც მათ მომავალში გამოადგებათ“, – აღნიშნა თამარ ფრუიძემ.

ახალციხის ახალგაზრდული ცენტრის დირექტორის თქმით, მიუხედავა იმისა, რომ პროექტი დასრულდა, ამით მათი საქმიანობა არ მთავრდება.

„რა თქმა უნდა პროექტს გააჩნია მდგრადობა, სამოქალაქო კლუბები ყველა სკოლებში შექმნილია, მათ გააჩნიათ საკუთარი სამოქედო გეგმები და ამის მიხედვით გაარგძელებენ მუშაობას, ჩვენ მათ საქმიანობას მონიტორინგს გავუწევთ“, – ამბობს მარინე სუდაძე.



[თამარ თოთაძე, ახალციხე]