ახალციხეში ახალგაზრდული ფესტივალი გაიმართება

ახალგაზრდული ფესტივალის მიზანია, სამცხე-ჯავახეთის რეგიონში მცხოვრებმა სამოქალაქო კლუბის ლიდერებმა (ახალგაზრდებმა) და სამოქალაქო საზოგადოების წევრებმა ერთობლივად იმსჯელონ სამოქალაქო საზოგადოების მნიშვნელობასა და ერთობლივი სამოქალაქო განათლებისა და საზოგადოების ძლიერი ჯაჭვის შექმნის შესაძლებლობაზე.

ღონისძიების ფარგლებში პირველ ეტაპზე დაგეგმილია ამხანაგური საფეხბურთო მატჩი სამცხე-ჯავახეთის სამოქალაქო კლუბის ნაკრებ გუნდებს შორის.

პარალელურად, ახალციხის ცენტრალური პარკიდან, ახალციხის გამგეობის შენობამდე, სიმბოლურად, „ახალგაზრდული მოძრავი ჯაჭვი“ გაკეთდება. სამოქალაქო კლუბის ლიდერები სამოქალაქო განათლებისა და სამოქალაქო საზოგადოების მნიშვნელობაზე საინფორმაციო ბუკლეტებს დაარიგებენ, რის შემდეგადაც გამგეობის საკონფერენციო დარბაზში გადაინაცვლებენ. გამგეობის საკონფერენციო დარბაზში ახალციხის ახალგაზრდული ცენტრი სამცხე-ჯავახეთის სამოქალაქო კლუბის წევრების მიერ ჩტარებული კვლევის შედეგების პრეზენტაციას გამართავს.

დაგეგმილია საკონფერენციო თემების „სამოქალაქო განათლების დაბალი დონე, არშემდგარი სამოქალაქო საზოგადოების“ პრეზენტაციაც.

ფესტივალის დასასრულს სხვილისისა და ბორჯომის საჯარო სკოლის სამოქალაქო კლუბის წევრები ახალციხის ცენტრალურ პარკში ფლეშ მობს მოაწყობენ.

ფესტივალი ახალციხის ახალგაზრდული ცენტრის „სამოქალაქო განათლებისა და პედაგოგთა გადამზადების პროგრამის“ ფარგლებში გაიმართება. ერთდღიანი ღონისძიება 11:00-დან 16:00 საათამდე გაგრძელდება.

[Sknews.ge]