“ახალგაზრდულმა ცენტრმა” პროექტის შედეგები შეაჯამა

პროგრამის ფარგლებში ორგანიზაციამ რეგიონის მასშტაბით 66 საჯარო სკოლაში სამოქალაქო კლუბი გააქტიურა. ამათგან, თავიანთი საქმიანობის შესახებ ანგარიში დღეს რვა კლუბმა წარმოადგინა.

”კლუბებმა ბოლო ექვსი თვის განმავლობაში არაერთი სამოქალაქო აქტივობა განახორციელეს. ეს ეხებოდა სოფლის დასუფთავების აქციას, რომლის დროსაც წევრებმა აქტიურად ითანამშრომლეს ადგილობრივ ხელისუფლებასთან; ასევე აქტიურად მონაწილეობდნენ სოციალურად დაუცველი ოჯახებისთვის დაგეგმილ საქველოქმედო აქციებში; კლუბის წევრები ჩართული იყვნენ სხვადასხვა ტრენინგებში და ა.შ”,- ამბობს PH International საქართველოს სამოქალაქო განათლებისა და პედაგოგთა გადამზადების პროგრამის (ACETT) გრანტების მენეჯერი თამარ ფრუიძე.

სამოქალაქო განათლებისა და პედაგოგთა გადამზადების პროგრამა 2010 წლის ივნისში დაიწყო და 2014 წლის ივნისში დასრულდება.

”საჯარო სკოლებთან ვითანამშრომლობთ და ვცდილობთ გავააქტიუროთ სამოქალაქო კლუბები, რათა პროგრამის დასრულების შემდეგ, თვითონ შეძლონ სხვადასხვა ღონისძიებების და აქციების დაგეგმვა და განხორციელება”,- განმატრავს ’’ახალციხის ახალგაზრდული ცენტრის’’ ხელმძღვანელი მაკა სუდაძე.

მსგავსი ღონისძიება ყოველი ექვსი თვის ბოლოს იმართება. ახალგაზრდული ცენტრის ხელმძღვანელი ამბობს, რომ პრეზენტაციის გამართვას ნინოწმინდისა და ახალქალაქის კლუბებშიც გეგმავდა, თუმცა მკაცრი კლიმატური პირობების გამო ვერ მოხერხდა.

დღევანდელ შეხვედრას პროგრამაში მონაწილე სამცხე-ჯავახეთის არაქართული და ქართული საჯარო სკოლების მოსწავლეები, მასწავლებლები, მშობლები, საგანმანათლებლო რესურსცენტრისა და არასამთავრობო ორგანიზაციის წარმომადგენლები და ადგილობრივი მედია-საშუალებები დაესწრნენ.

[თინათინ ზაზაძე, ახალციხე]