სამოქალაქო კლუბებმა ახალგაზრდული ბანაკის შედეგები შეაჯამეს

სამცხე-ჯავახეთის სამოქალაქო კლუბების წევრებმა სამოქალაქო ინტეგრაციის ბანაკის ფარგლებში ექვსი პროექტი განახორციელეს. ხუთი დღის განმავლობაში დაბა ბაკურიანში ახალგაზრდები პროექტების წერას სწავლობდნენ. აღნიშნული ბანაკი გარემოსდაცვითი ორგანიზაცია „აწყურის“ პროექტის ფარგლებში, სამოქალაქო განათლებისა და პედაგოგთა გადამზადების პროგრამის ხელშეწყობით მოეწყო.

„ბაკურიანში სამოქალაქო კლუბის წევრმა, 50-მდე ახალგაზრდამ ტრენინგები გაიარა და პროექტების წერა ისწავლა. დაიწერა ექვსი პროექტი, რომელიც რამდენიმე თვის განმავლობაში განვახორციელეთ. თითოეული პროექტი 800 აშშ დოლარით დაფინანსდა“, - ამბობს გარემოსდაცვითი არასამთავრობო ორგანიზაცია „აწყურის“ თავმჯდომარე ნანა ნათენაძე.

ახალციხის დემოკრატიული ჩართულობის ცენტრში აღნიშნული პროექტების პრეზენტაცია გაიმართა.

„აღნიშნული პროექტების ძირითადი მიმართულება უნდა ყოფილიყო ინტეგრაცია ქართველ და არაქართველ ახალგაზრდებს შორის. საკმაოდ წარმატებულად განახორციელეს ეს პროექტები და დღევანდელი ღონისძიება იყო შემაჯამებელი, სადაც წარმოადგინეს თუ რა შედეგებით დამთავრდა ესა თუ ის პროექტი“, - ამბობს ახალციხის ახალგაზრდული ცენტრის ხელმძღვანელი მარინე სუდაძე.

ღონისძიებას სამოქალაქო განათლებისა და პედაგოგთა გადამზადების პროგრამის გრანტების მენეჯერი თამარ ფრუიძე და USAID დემოკრატიისა და განვითარების განყოფილების დირექტორის მოადგილე დევიდ სტოუნჰილი ესწრებოდნენ. ასევე, ახალციხის მუნიციპალიტეტის კულტურის სამსახურის წარმომადგენლები და სამოქალაქო კლუბების წევრები. პრეზენტაციის შემდეგ ბაკურიანის ბანაკში გადაღებული ფილმის ჩვენება გაიმართა. შემდეგ კი მონაწილეებს საჩუქრები გადაეცათ.

[თამარ თოთაძე, ახალციხე]