ადიგენის გამგებელს 3000 ლარის ოდენობის გირაო დააკისრეს

სიმონ პარუნაშვილის სასამართლო პროცესი ნახევარი საათის წინ დასრულდა. სიმონ პარუნაშვილს ორი ადვოკატი ირაკლი ბარძიმაძე და კარაპეტ კირაკოსიანი იცავდნენ.

პროკურორი რევაზ მამადაშვილი ბრალდებულისთვის გირაოს სახით 12 000 ლარის დაკისრებას ითხოვდა. მოსამართლე
გიორგი ლონდარიძემ მისი შუამდგომლობა ნაწილობრივ დააკმაყოფილა და გამგებელს გირაოს სახით 3 ათასი ლარის გადახდა დააკისრა.

ბრალდებულის ადვოკატმა ირაკლი ბარძიმაძემ სასამართლო პროცესზე კიდევ ერთხელ განმარტა, რომ სიმონ პარუნაშვილი არის უკანონო პატიმარი, რადგან ის სასამართლო განჩინების გარეშეა დაპატიმრებული. ადვოკატმა პარუნაშვილის სასამართლო პროცესიდან დაუყოვნებლივ, აღკვეთის ღონისძიების გარეშე გათავისუფლება მოითხოვა.

ბრალდებულის ადვოკატის კითხვაზე, რატომ გახდა საჭირო ასე სასწრაფოდ სიმონ პარუნაშვილის დაკავება, პროკურორმა განმარტა, რომ შესაძლოა ის მიმალულიყო და სასამართლოსთვის თავი აერიდებინა.

„პროკურორს არანაირი მტკიცებულება არ აქვს იმისა, რომ პარუნაშვილი მიიმალება. პარუნაშვილი მხოლოდ ამ მიზეზით არის დაკავებული“,-ამბობს ირაკლი ბარძიმაძე.

მისივე თქმით, სასამართლომ უკანონო გადაწყვეტილება მიიღო.

„სასამართლომ მიიღო უკანონო გადაწყვეტილება, მართალია ნაწილობრივ დააკმაყოფილა პროკურორის შუამდგომლობა 12 ათასის ნაცვლად 3 ათასი შეუფარდა, მაგრამ ჩვენ აუცილებლად გავასაჩივრებთ სააპელაციო სასამართლოში. იმედია ამ ქვეყანაში სადღაც მაინც იქნება კანონი“,- ამბობს ბარძიმაძე.

შეგახსენებთ,რომ ადიგენის მუნიციპალიტეტის გამგებელი 27 აგვისტოს დააკავეს. პარუნაშვილი თავს დამნაშავედ არ ცნობს, იგი აცხადებს, რომ მისი დაკავება პოლიტიკური ნიშნით მოხდა.

[მანანა სარაშვილი, ახალციხე]