‘მხარს ვუჭერთ სომეხ ხალხს’ – ახალქალაქში გამართულ აქციას ხელისუფლების წარმომადგენლებიც ესწრებოდნენ

სამველ მანუკიანი აქციას ესწრებოდა ახალქალაქის სტადიონზეც და ეკლესიის ეზოშიც. მუნიციპალიტეტის მერი, იურიკ უნანიანი კი ირწმუნება, რომ მხოლოდ ეკლესიაში მივიდა.

„ჩვენ მხარს ვუჭერთ სომეხ ხალხს, მსოფლიომ იცის რატომ დაიწყო ომი ყარაბაღში, იქ ადამიანები იღუპებიან, ძალიან კარგად იცის ხალხმა ვინაა აგრესორი. დღევანდელი აქციით ჩენ სოლიდარობა გამოვუცხადეთ სომეხ ერს“, – განაცხადა „სამხრეთის კარიბჭესთან“ სამველ მანუკიანმა.

„სამხრეთის კარიბჭეს“ კითხვაზე, ფიქრობს თუ არა, რომ მმართველი პარტიის, ქვეყნის ხელისუფლების წარმომადგენელი აქციაში მონაწილეობით ეწინააღმდეგება სახელმწიფოს პოლიტკას კონფლიქტთან მიმართებაში. ასე პასუხობს: „ამ აქციას ლიდერები არ ჰყოლია და არც პოლიტიკური განცხადებები არ გაკეთებულა. აქციაზეც ხალხი სოლოდარობაზე საუბრობდა, ლექსებს ჰყვებოდა, ისტორიას იხსენებდა. მე კანდიდატი ვარ, მოქმედი დეპუტატი და ჩემი ხალხის გვერდით ვიყავი. ასეთი აქციის ჩატარება შეუძლიათ საქართველოში მცხოვრებ აზერბაიჯანელებსაც, თუ თვლიან რომ სოლოდარობა ჭირდებათ“, – ამბობს მანუკიანი.

ახალქალაქის მერი, იური უნანიანი ამბობს, რომ დღევანდელი აქციის შესახებ ფეისბუკზე გამოქვეყნებული პოსტით შეიტყო: "ეს უბრალოდ სოლიდარობის გამომხატველი აქციაა, მხარდაჭერაა მეტი არაფერი".

ახალქალაქში სომხეთის მხარდამჭერი აქცია დღეს, ექვს ოქტომბერს გაიმართა.

აქციის მონაწილეები ჯერ ახალქალაქის სტადიონზე შეიკრიბნენ, შემდეგ კი ქალაქში მდებარე ეკლესიის ეზოში გადაინაცვლეს.

მთიანი ყრაბაღის გამო, სომხეთსა და აზერბაიჯანს შორის დაპირისპირება 27 სექტემბერს დაიწყო. კონფლიქტის გაღვივებაში ორივე მხარე ერთმანეთს ადანაშაულებს. კონფლიქტის დაწყებიდან დღემდე ახალქალაქში, ნინოწმინდაში, ახალციხესა და ასპინძაში მცხოვრები ეთნიკური უმცირესობები თანხას, პროდუქტსა და მედიკამენტებს აგროვებენ და სომეხი ჯარისკაცების დასახმარებლად გზავნიან.

[sknews.ge]