ახალქალაქის სტადიონიდან აქციის მონაწილეებმა ეკლესიაში გადაინაცვლეს

მშვიდობიან აქციაში მონაწილეობას ასობით ადამიანი იღებს, ადგილობრივებთან ერთად იმყოფებიან სასულიერო პირებიც.

ისინი ეკლესიის მიმართულებით მიდიან შეძახილებით, "ჩვენ გავიმარჯვებთ!", "ყარაბაღ!".

აქციის მონაწილეებთან ერთად, ეკლესიის ეზოში იმყოფებიან ადგილობრივი თვითმმართველობის წარმომადგენლები.

"შეკრებილები სოლიდარობას უცხადებენ ყარაბაღის კონფლიქტში მონაწილეებს, აქ რაიმე სახის მოწოდებებს ვერ მოისმენთ, მშვიდობიანი აქციია", – ამბობს ახალქალაქის მერი იურიკ უნანიანი.

მისი თქმით, აქციის მონაწილეებს ღონისძიების ჩატარების ნებართვისთვის არ მიუმართავთ: "ჩვენც გავიგეთ ფეისბუკის საშუალებით, ვიცოდით რომ იგეგმებოდა. მე სტადიონზე არ ვყოფილვარ, აქ შემოვუერთდი".

ადგილობრივები ამბობენ, რომ აქციაში მონაწილეობას მათთან ერთად იღებენ, ბორჯომის, ასპინძის, ახალციხის, ნინოწმინდის და წალკის მუნიციპალიტეტებში მცხოვრები ეთნიკურად სომეხი მოსახლეობა.

ახალგაზრდები "სამხრეთის კარიბჭესთან" აცხადებენ, რომ 27 სექტემბრიდან, მას შემდეგ რაც ყარაბაღის კონფლიქტი გამწვავდა, ყოველდღიურად ახალქალაქის მუნიციპალიტეტში 100 000 ლარამდე გროვდება.

„თითქმის ყოველდღე მიდის აქედან ბოსტნეულით, სხვადასხვა საკვებით, თუ ტანსაცმლით დატვირთული მანქანები. სოფელ ჩამდურადან ერთი მანქანა კარტოფილი გაგზავნეს. საბურავების გატანაც გვინდოდა, უარი გვითხრეს და უკან დავაბრუნეთ“,- ამბობს ერთ–ერთი ადგილობრივი სედრაქ მურადიანი.

მისი თქმით, რეგიონში 10 დღის განმავლობაში, სომხეთის დასახმარებლად მილიონ ლარზე მეტი შეგროვდა.





[მარიამ ბარძიმაძე]