ახალგაზრდები პოლიციას შევიწროებაში ადანაშაულებენ – საპროტესტო აქცია ახალქალაქში

დავიდ მანუკიანი ამბობს, რომ სეზონურ სამუშაოზე რუსეთში დადის და ყოველთვის, როცა ბრუნდება სამუშაოდან, იწყებენ მის დაკითხვას ახალქალაქში მომხდარი სხვდასახვა დანაშაულების გამო.

იგივეს ამბობს კიმ კუგოიანი, აქციის ერთ–ერთი მონაწილე, რომელიც პოლიცამ გადამოწმების მიზნით ახალქალაქიდან ახალციხეში 5 დეკემბერს გადაიყვანა. კუგოიანი აცხადებს, რომ პოლიცია მას ქვეყნის დატოვებას აიძულებს.

გამოცემა "ჯეინიუსის" ცნობით, აქციის მონაწილეებს საქართველოს სახალხო დამცველის წარმომადგენელი სამცხე–ჯავახეთში სალომე ყულჯანიშვილი და ამავე ოფისის სხვა თანამშრომლები შეხვდნენ. მათ აქციის მონაწილეებს ურჩიეს, რომ თუ საქმის სამართლებრივად წარმოება სურთ, ადვოკატი აიყვანონ, ან მათ ოფისს მიმართონ.

აქცია ახალქალაქის გამგეობასთან იმართება. „ჯეინიუსის“ კითხვაზე, რატომ აირჩიეს ეს ადგილი და არა პოლიციის შენობა, აქციის მონაწილეებმა განაცხადეს, რომ მათ სურდათ მათი პრობლემების შესახებ ადგილობრივი თვითმმართველობის წარმომადგენლებისთვის ეცნობებინათ.

"ჯეინიუსის" ცნობით, აქციის მონაწილეებს ახალქალაქის მერთან, იურიკ უნანიანთან სურდათ შეხვედრა. იმ დროს, როდესაც ახალგაზრდები მერიის შენობაში შევიდნენ, მერი, თანამშრომლებთან ერთად, შენობას ტოვებდა, საუბარი დერეფანში შედგა. იურიკ უნანიანმა აქციის მონაწილეებს განუცხადა, რომ პირველად ესმის პოლიციის მსგავსი ქმედების შესახებ და მოგვიანებით მისვლა სთხოვა, იმ მოტივით, რომ ახლა ეკლესიაში მიდის, სადაც 1988 წელს სომხეთში მომხდარი მიწისძვრისას დაზარალებულების პანაშვიდი იმართება.

ეკლესიაში აქციის მონაწილეებიც წავიდნენ, შემდგ კი კვლავ ახალქალაქის გამგეობის შენობასთან დაბრუნდნენ.

[Sknews.ge]