მედიამონიტორინგი: ‘სამხრეთის კარიბჭე’ სიღრმისეულად და მიუკერძოებლად აშუქებს მოვლენებს

ჟურნალისტური ეთიკის ქარტიის კვლევა საქართველოს 2020 წლის საპარლამენტი არჩევნების მედიაში გაშუქების შესახებ, 15 ივნისიდან 31 აგვისტოს პერიოდშია მომზადებული.

კვლევის მიხედვით „სამხრეთის კარიბჭე“ – sknews.ge განსაკუთრებით აქტიურად აშუქებდა სამცხე-ჯავახეთში მიმდინარე მოვლენებს: „ვებგვერდზე არ შეინიშნებოდა განსაკუთრებულად დადებითი ან უარყოფითი განწყობები რომელიმე პოლიტიკური ძალის მიმართ. ცალკეულ სტატიებში მაღალ დონეზე იყო დაცული ჟურნალისტური სტანდარტები“, - წერია დოკუმენტში.

მათი ინფორმაციით, მედიასაშუალების მიერ მომზადებულ მასალებში დადებითი ან უარყოფითი ტონის განსაკუთრებულად მაღალი მაჩვენებლები პარტიების გაშუქებისას არ გამოვლენილა.

„მონიტორინგის პერიოდში sknews.ge გამოირჩეოდა საკითხების სიღრმისეული და მრვალმხრივი გაშუქებით. სტატიებში უმეტესად კარგად იყო დაცული ინფორმაციის წყაროთა ბალანსი. განსაკუთრებით ხაზგასასმელია, რომ ვებ–გვერდი აქტიურად აშუქებდა ადგილობრივი მოსახლეობის პრობლემებს და ამ ტიპის სტატიებში წარმოდგენილი იყო როგორც ადგილობრივი მოსახლეობის ასევე პასუხისმგებელ პირთა პოზიციები (მაგალითად, სტატიებში „ფულს ხარჯავენ, წყალი არ გვაქვს’ - აწყურში სარწყავი წყლის გამო დაპირისპირება მოხდა“, 5 აგვისტო, 2020; “ახალციხის მერიის შეცდომა თუ დეპუტატის გავლენით დაკანონებული მიწა”, 11 აგვისტო, 2020)“.

აქვე საუბარია არასამთავრობო ორგანიზაციების მიერ ჩატარებული კვლევების გაშუქების სტანდარტებზეც: „მონიტორინგისთვის შერჩეული ვებგვერდების უმრავლესობისგან განსხვავებით, sknews.ge მაღალ დონეზე იცავდა კვლევების გაშუქების სტანდარტს. მაგალითად, „საერთაშორისო გამჭვირვალობა საქართველოს“ მიერ მომზადებულ კვლევას ახალციხის დეპუტატების მიერ არასრულად შევსებული დეკლარაციების შესახებ sknews.ge-მ ცალკე სტატია დაუთმო თავად კვლევაში ნახსენები დეპუტატების განმარტებებს („რა პასუხი აქვთ ახალციხელ დეპუტატებს არასრულად შევსებულ დეკლარაციებზე“, 24 ივლისი, 2020)“.

მონიტორინგი შეეხო სარეკლამო და სარედაქციო მასალების ერთმანეთისგან გამიჯვნის საკითხსაც:

„მონიტორინგის შედეგად, შეგვიძლია დავასკვნათ, რომ sknews.ge სიღრმისეულად და მიუკერძოებლად აშუქებს ქვეყანაში,უმეტესად სამცხე-ჯავახეთის რეგიონში, მიმდინარე მოვლენებს. ვებგვერდი მაღალ დონეზე იცავს ჟურნალისტურ სტანდარტებს. აღსანიშნავია, რომ sknews.ge ნათლად მიჯნავს ერთმანეთისგან სარეკლამო და სარედაქციო მასალებს“.

ანგარიშში მოცემულია 13 ონლაინ მედიასაშუალების კვლევა, მათ შორის: ambebi.ge, interpressnews.ge, kvira.ge, mpn.ge, netgazeti.ge, news.on.ge, primetime.ge, publika.ge, radiotavisupleba.ge, reginfo.ge, sknews.ge, sputnik-georgia.com, tabula.ge.

„საქართველოს ჟურნალისტური ეთიკის ქარტია ქართული ონლაინ მედიის მიერ 2020 წლის საპარლამენტო არჩევნების გაშუქებას “ევროკავშირის ფინანსური დახმარებით აკვირდება.

ვრცლად მონიტორინგი შეგიძლიათ ნახოთ აქ.

[sknews.ge]