უკრაინაში მიმდინარე მოვლენებს ჟურნალისტური ეთიკის ქარტია ეხმიანება

განცხადებაში ნათქვამია, რომ საქართველოს ჟურნალისტური ეთიკის ქარტია განსაკუთრებული ყურადღებით ადევნებს თვალს უკრაინაში მიმდინარე პროცესებს: „ჩვენ ყოველდღიურად ვადევნებთ თვალს, როგორი საფრთხის ქვეშ, რამდენად მძიმე ვითარებაში უწევთ როგორც უკრაინელ, ისე მსოფლიოს სხვადასხვა ქვეყნიდან ჩასულ ჟურნალისტებს, ვიდეოოპერატორებს, ფოტორეპორტიორებს მუშაობა იმისთვის, რომ ჩვენ გვქონდეს ინფორმაცია“.

ამიტომ, ქარტია მიმართავს თხოვნით საქართველოს საგარეო საქმეთა სამინისტროს, საქართველოს დიპლომატიურ წარმომადგენლობას უკრაინაში, მაქსიმალურად დაეხმარონ და ხელი შეუწყონ ქართველი ჟურნალისტების მუშაობას ცხელ წერტილში და რაც მთავარია მაქსიმალურად იზრუნონ ჟურნალისტების უსაფრთხოებაზე.

„მიგვაჩნია, რომ დღეს უაღრესად საჭირო და ამავე დროს დასაფასებელია მათი შრომა, თავისუფალი მედიის იდეა ხომ ჩვენთვისაც საზიაროა და იმავე ბრძოლის ნაწილია, რასაც ევროპული არჩევანისთვის ბრძოლა ჰქვია“, - ნათქვამია ქარტიის ოფიციალურ განცხადებაში.

საქართველოს ჟურნალისტური ეთიკის ქარტია მწუხარებას გამოთქვამს უკრაინაში მიმდინარე მოვლენებისას დაღუპული და დაშავებული მოქალაქეების გამო: „გვინდა, გამოვთქვათ ჩვენი მწუხარება, რომ კიევში უკიდურეს დაძაბულობას მსხვერპლი მოჰყვა – არიან დაღუპულები და დაჭრილები, მათ შორის საქართველოს მოქალაქეებიც, მედიის წარმოამდგენლებიც – ჟურნალისტი ვიაჩესლავ ვერემი. ვუსამძიმრებთ, დაღუპულთა ოჯახებს, კოლეგებს".

[sknews.ge]