ჟურნალისტური ეთიკის ქარტია შსს–სა და საერთაშორისო ორგანიზაციებს მიმართავს

გარდა ამისა, ჟურნალისტური ეთიკის ქარტია მიმართავს შინაგან საქმეთა სამინისტროს, დაიცვას "სამხრეთის კარიბჭის" ჟურნალისტების უსაფრთხოება, თუმცა, ეს ქარტიის პირველი მიმართვა არ არის. ამ მოთხოვნით ქარტიამ შსს–ს 11 დეკემბერსაც მიმართა, მას შემდეგ, რაც „სამხრეთის კარბჭეს“ ოფისთან ახალქალაქის მუნიციპალიტეტის სოფელ გოგაშენში მცხოვრებთა ნაწილმა აქცია გამართა.

„განვითარებული მოვლენები გვაძლევს საფუძველს, ვივარაუდოთ, რომ “სამხრეთის კარიბჭის” სარედაქციო დამოუკიდებლობაში უშუალოდ შსს-ს თანამშრომლები ერევიან. ქარტიის საბჭო ფლობს ინფორმაციას გამოცემის ჟურნალისტის მიმართ ბოლო 2 დღის განმავლობაში განხორციელებული მუქარისა და შანტაჟის შესახებ.

საქართველოს ჟურნალისტური ეთიკის საბჭო მოუწოდებს შსს-ს გენერალურ ინსპექციასა და საქართველოს პროკურატურას, უსწრაფესად გამოიძიონ “სამხრეთის კარიბჭის” ჟურნალისტებზე მიმდინარე ზეწოლის ფაქტები. შსს-ს მხრიდან უნდა შეწყდეს გამოცემის სარედაქციო საქმიანობაში ჩარევის მცდელობები და სრულად უზრუნველყონ ჟურნალისტების უსაფრთხოება.

ამ პროცესში მონაწილე პირებს შევახსენებთ, რომ ჟურნალისტის პროფესიული საქმიანობისთვის უკანონოდ ხელის შეშლა, ე.ი. მისი იძულება, გაავრცელოს ინფორმაცია ან თავი შეიკავოს მისი გავრცელებისაგან ისჯება საქართველოს სისხლის სამართლის კოდექსის 154-ე მუხლით.
ქარტიის საბჭო სრულ სოლიდარობას უცხადებს გაზეთ “სამხრეთის კარიბჭეს” და მოუწოდებს მედიასაშუალებებს, სამოქალაქო საზოგადოებას, სახალხო დამცველს და საერთაშორისო ორგანიზაციებს, ყურადღებით დააკვირდნენ “სამხრეთის კარიბჭის” ირგვლივ მიმდინარე მოვლენებს“, – ნათქვამია ქარტიის განცხადებაში.

სამხრეთის კარიბჭის" ჟურნალისტზე ზეწოლა და საქმიანობაში ხელის შეშლის მცდელობა 8 დეკემბერს დაიწყო, მას შემდეგ, რაც გამოქვეყნდა ჟურნალისტ თამუნა უჩიძის სტატია, სახელწოდებით: “ბრალდებულის და: სამხარეოს უფროსმა წიხლები მირტყა, ტანსაცმელი შემომაგლიჯა და გაუპატიურებით დამემუქრა”.

სტატიას მოჰყვა სამი სატელეფონო ზარი შინაგან საქმეთა სამინისტროს პრესსამსახურიდან „სამხრეთის კარიბჭეს“ რედაქტორსა და ჟურნალისტთან, სტატიის სათაურის შეცვლის თხოვნით. და ასევე, ჟურნალისტ თამუნა უჩიძესთან მივიდა სამი ადამიანი. ამათგან, ერთი სტატიის სათაურის შეცვლას ითხოვდა, ორი კი თამუნა უჩიძეს „მეგობრულად ურჩევდა“ აღარ ეწერა ამ ტიპის სტატიები, დაეთანხმებინა სტატიის მთავარი რესპონდენტი და შეეცვალათ წინა სტატიაში მონათხრობი, იმიტომ, რომ „სახელმწიფო ინტერესია ახალქალაქში სიმშვიდე იყოს“. წიააღმდეგ შემთხვევაში, არ იყო გამორიცხული, მასზე მომხდარიყო მეტი ზეწოლა და „დაუმახინჯდებოდა ცხოვრება“.

გუშინ, 14 დეკემბერს, „სამხრეთის კარიბჭეს“ ჟურნალისტებმა და საქართველოს ჟურნალისტური ეთიკის ქარტიის საბჭომ ქარტიის ოფისში პრესკონფერენცია გამართეს და დეტალურად ისაუბრეს „სამხრეთის კარიბჭეს“ ირგვლივ განვითარებულ მოვლენებზე.

[ნინო ნარიმანიშვილი, თბილისი]