სამცხე–ჯავახეთში თვითიზოლაციასა და კარანტინში მყოფი მოქალაქეების რაოდენობა გაიზარდა

კარანტინში მყოფი 179 მოქალაქედან ცხრა ახალციხეში, სასტუმრო „გრანდ პალასშია“ განთავსებული, ხოლო დანარჩენი 170 ბაკურიანში მდებარე ექვს სასტუმროშია გადანაწილებული.

თვითიზოლაციაში მყოფი პირების რაოდენობა რეგიონის მასშტაბით ბოლო სამ დღეში 85–მდე გაიზარდა.

რეგიონის ექვსი მუნიციპალიტეტიდან ყველაზე მეტი, 38 პირი ადიგენში, სოფელ ჭეჭლაში იმყოფება. სამ ადგილობრივს კორონავირუსი ბათუმში, ქორწილში ყოფნის შემდეგ გამოუვლინდათ.

თვითიზოლაციაში 37 პირია ახალციხეში, აღნიშნულ მოქალაქეებს სომხეთიდან ჩამოსულ ბიზნესმენთან ჰქონდათ კავშირი, რომელსაც მოგვიანებით covid-19 დაუდასტურდა.

ამ ეტაპისთვის სავალდებულო თვითიზოლაციაში ნინოწმინდაში შვიდი ადგილობრივი იმყოფება, ხოლო ახალქალაქში სამი. ბორჯომში არცერთი.

მთავრობის ოფიციალური საიტის stopcov.ge-ს თანახმად, საქართველოში კორონავირუსის 3 913 შემთხვევა გამოვლინდა, გამოჯანმრთელებული პაციენტების რაოდენობა 1 574–მდე გაიზარდა. გარდაიცვალა 23 პირი, კარანტინის რეჟიმში იმყოფება 5 255 მოქალაქე, სტაციონარში მეთვალყურეობის ქვეშ - 836. უცხოეთიდან სამკურნალოდ გადმოყვანილი საქართველოს მოქალაქეების რაოდენობა 41–ია.

[ნუკა სტეფნაძე]