სამცხე–ჯავახეთში თვითიზოლაციასა და კარანტინში 447 მოქალაქე იმყოფება

კარანტინში მყოფი 421 მოქალაქედან 103 ახალციხეში, სასტუმრო „გრანდ პალასშია“ განთავსებული, ხოლო 318 მოქალაქე ბაკურიანში მდებარე ექვს სასტუმროშია გადანაწილებული.

თვითიზოლაციაში რეგიონში 26 პირი იმყოფება, აქედან 14 ბორჯომშია, 12 ახალქალაქში.

„ძირითადად საკარანტინო ზონიდან არიან, მცირეწლოვანები ყავთ და სახლში ამიტომ რჩებიან, ნაწილი კი დადასტურებული შემთხვევასთან კონტაქტია რომლებიც თბილისში იყვნენ და არა ბორჯომში“, – ამბობს ბორჯომის საზოგადოებრივი ჯანდაცვის ცენტრის ხელმძღვანელი, მანანა რატიანი.

რაც შეეხება ახალქალაქს, თვითიზოლაციაში მყოფი 12 მოქალაქე თავს კარგად გრძნობს და ვირუსისთვის დამახასიათებელი სიმპტომები არ აღენიშნება.

„უცხოეთიდან შემოსულები არიან და რჩებიან თვითიზოლაციაში. ყველა მათგანი თავს კარგად გრძნობს და ორ დღეში დაასრულებენ თვითიზოლაციას“, – განგვიცხადეს ახალქალაქის საზოგადოებრივ ჯანდაცვის სამსახურში.

სამცხე–ჯავახეთში „ცხელების ცენტრების“ გაუქმების შემდეგ, პაციენტები ვირუსის დადასტურების შემდეგ გორის ან თბილისის კოვიდკლინიკებში გადაჰყავთ.

ბოლო 10 დღის მონაცემებით, ბაკურიანში არსებულ საკარანტინო ზონებში, კოვიდინფიცირების არცერთი შემთხვევა არ დადასტურებულა.

stopcov.ge-ზე განთავსებული მონაცემები ასეთია:

კორონავირუსის დადასტურებული შემთხვევა - 2 758
მათ შორის გამოჯანმრთელებული - 1 412
მათ შორის გარდაცვლილი - 19
კარანტინის რეჟიმში - 6633
სტაციონარში მეთვალყურეობის ქვეშ - 836
*უცხოეთიდან სამკურნალოდ გადმოყვანილი საქართველოს მოქალაქეები - 41

[ნუკა სტეფნაძე]