სამცხე–ჯავახეთში თვითიზოლაციასა და კარანტინში მყოფი პირების რაოდენობა შემცირდა

სამცხე–ჯავახეთში, რეგიონის მასშტაბით სულ ექვსი საკარანტინო ზონაა გახსნილი. 309 მოქალაქიდან 66 ახალციხეში, სასტუმრო „გრანდ პალასშია“ მოთავსებული. ხოლო დანარჩენი 243 ადამიანი, ბაკურიანის ხუთ სასტუმროშია გადანაწილებული.

თვითიზოლაციაში ერთი პირია და ის ახალციხეში იმყოფება, რეგიონის სხვა მუნიციპალიტეტებში, თვითიზოლაციაში არავინ არაა.

დღეს, ახალციხის „ცხელების ცენტრში“ კორონავირუსის მეორე შემთხვევა დაფიქსირდა პირს, რომელსაც კორონავირუსი დაუდასტურდა კლინიკაში საკარანტინო ზონიდან მოათავსეს.

29 აპრილის მონაცემებით, სამცხე–ჯავახეთში მდებარე საკარანტინო ზონებში მყოფებიდან, კორონავირუსი სამ მოქალაქეს დაუდგინდა.

ამ დროისთვის საქართველოში კორონავირუსის 517 შემთხვევაა დადასტურებული. აქედან 168-მ შეძლო ვირუსის დამარცხება. კარანტინის რეჟიმში 5 153 პაციენტი იმყოფება, ხოლო სტაციონალური მეთვალყურეობის ქვეშ 549. გარდაცვლილია ექვსი მოქალაქე.

[ნუკა სტეფნაძე, ახალციხე]