კაცს, რომელიც ახალციხეში გასვენებაში იყო კორონავირუსი დაუდასტურდა

ს.ა-ს დედის დაკრძალვა ქალაქ ახალციხეში, კვირას, 13 სექტემბერს იყო. როგორც „სამხრეთის კარიბჭესთვის“ გახდა ცნობილი, ინფიცირებული სომხეთ-საქართველოს საზღვარზე ტრაილერით შემოვიდა, დაესწრო დედის დაკრძალვას და უკან დაბრუნებისას, ამავე საზღვარზე კორონავირუსი დაუდასტურდა.

ამის გამო, ახალციხის კლინიკა „იმედსა“ და ახალციხის საზოგადოებრივი ჯანდაცვის ცენტრში იმ პირების ტესტირება მიმდინარეობს, რომლებიც გასვენებაში იმყოფებოდნენ.

არც ჯანდაცვის ცენტრსა და არც დაავადებათა კონკტროლის ეროვნული ცენტრის რეგიონულ განყოფილებაში ფაქტზე კომენტარს არ აკეთებენ.

ახალციხის ჯანდაცვის ცენტრის ხელმძღვანელმა, ფატი ხაბულიანმა განაცხადა, რომ „სამხრეთის კარიბჭეს“ კომენტარს არასდროს გაუკეთებს. კორონავირუსის შესახებ ფაქტს კი, არც უარყოფს და არც ადასტურებს.

თუმცა „სამხრეთის კარიბჭე“ კლინიკა „იმედში“ იმ დროს მივიდა, როცა დაახლოებით 10 ადამიანი იქ ტესტის გასაკეთებლად იყო დაბარებული. ამ პირებს ხაბულიანი და მისი თანამშრომლები კლინიკის ეზოში დახვდნენ და საზოგადოებრივი ჯანდაცვის ცენტრის ოფისში გადაამისამართეს, ტესტის გასაკეთებლად.

„გასვენებაში რომ კაცს შევხვდით, მაგის გამო დაგვიბარეს, ტესტები უნდა გაგიკეთოთო ეგრე გავიგეთ“, - ამბობს ბახვა კუპრაძე.

ამავე გასვენებაში მყოფი კარაპეტ სუჯიანის თქმით, დაახლოებით 150 ადამიანი იყო დაკრძალვაზე: „მანქანით მოვიდა ახალციხეში [ინფიცირებული], გასვენებაში 150 კაცი მაინც იქნებოდა მაღლა. მე მარტო ხელი ჩამოვართვი, სუფრაზე არ ვყოფილვარ. ახლა აქ ოჯახის წევრები მოვედით, რომ ტესტი აგვიღონ, ექვსნი ვართ“.

გაიხსნება თუ არა ამ შემთხვევის შემდეგ ახალციხეში „ცხელების ცენტრი“, ექიმები ვერ გვპასუხობენ. კლინიკა „იმედში“ ამბობენ, რომ მათთან არ იგეგმება და შესაძლოა „ცხელების ცენტრი" რეფერალურ საავადმყოფოში გაიხსნას. რეფერალურ საავადმყოფოში კი ამბობენ, რომ ამის შესახებ ჯერ მითითება არ მიუღიათ: „ამასთან დაკავშირებით ინფორმაცია არ მაქვს, უჩემოდ როგორ გადაკეთდება?!“ ,– ამბობს ახალციხის რეფერალური ჰოსპიტალის ხელმძღვანელი, რეზო კუჭუხიძე.







[ნუკა სტეფნაძე, თაკო ფეიქრიშვილი]