‘არ მგონია ქვეყნაში ისეთი მდგომარეობა შეიქმნას, რომ ვერ შევძლოთ დასტაბილურება’– ეზუგბაია

„ჯანდაცვის სისტემა დღესაც უძლებს აღნიშნულ სიტუაციას. ჩვენ როდესაც ორნიშნა ციფრები გვქონდა 460–500 საწოლზე იყო გათვლილი. დღეს არის სამნიშნა ციფრები და საწოლების რაოდენობა გასამმაგდა, თუ საჭირო გახდა იქნება 3 000–იც. პარალელურად შეიქმნა სასტუმრო ჰოსპიტლები, სადაც მოხდება მსუბუქი და ასიმპტომური პაციენტების გადაყვანა“,– განაცხადა ეზუგბაიამ.

მისი თქმით, დღეს გამოვლენილი 170 შემთხვევიდან უმეტესობა აჭარაშია.

„170 დადასტურებულ შემთხვევაზე ორნაირი ახსნა მაქვს. 88 არის დადასტურებულ შემთხვევებთან კონტაქტი, 50 არის მოგზაურობის ისტორიით, 4 საკარანტინო სივრცეში დადასტურებულია, დანარჩენი არის ცხელების ცენტრებში დადასტურებული შემთხვევები, რომელთა კონტაქტების მოძიება გრძელდება. ეს 170 შემთხვევა რეგიონების მიხედვით ასე ნაწილდება -124 გახლავთ აჭარა, ანუ ბათუმი, 20 -თბილისი, 13- იმერეთი, ანუ ქუთაისი, 6 სამეგრელო ზემო სვანეთი-ზუგდიდი, 3 გახლავთ გურია-ოზურგეთი, 3 გახლავთ მცხეთა-მთიანეთი და ერთი არის რაჭა-ლეჩხუმი ქვემო სვანეთი, ცაგერი“, – განმარტა ეზუგბაიამ ჟურნალისტებთან.

2 562 ინფიცირებულიდან გამოჯანმრთელდა 1 381, კლინიკებში მკურნალობს 1 154 პაციენტი, 19 კი გარდაცვალა.

ექიმების განმარტებით, ინფიცირებული პაციენტებიდან 35–ის მდგომარეობა მძიმეა, ხუთის კრიტიკულად მძიმე, ხოლო დანარჩენები საშუალო და მსუბუქი სიმძიმისაა.

[ნუკა სტეფნაძე]