საქართველოში კორონავირუსით ინფიცირებული 3 პაციენტის მდგომარეობა კრიტიკულად მძიმეა

თბილისის ინფექციური საავადმყოფოს სამედიცინო დირექტორის თქმით, საქართველოში დღეს გამოვლენილი 38 შემთხვევიდან 22 ბათუმში დაფიქსირდა. დღევანდელი მონაცემებით, „კოვიდ ცენტრებში“ მკურნალობს 251 პაციენტი. აქედან რეანიმაციულ და ინტენსიური თერაპიის განყოფილებებში, 3 კრიტიკულად მძიმე და 15 მძიმე პაციენტია, დანარჩენების მდგომარეობა საშუალო და მსუბუქი სიმძიმისაა.

„კორონავირუსის 38 ახალი შემთხვევიდან 22 ბათუმის საკონდიტრო „დონას“ კლასტერიდანაა, შვიდი - დაავადებულ პაციენტებთან კონტაქტი, ოთხი - შემოტანილი შემთხვევა, საიდანაც ორი პაციენტი არის სატვირთო ავტომობილის მძღოლი, ხოლო ხუთ შემთხვევაზე მიმდინარეობს კვლევა“, – ამბობს ეზუგბაია.

რაც შეეხება თბილისის ინფექციურ საავადმყოფოს, ამ ეტაპზე კლინიკაში 13 კოვიდინფიცირებული პაციენტი მკურნალობს.

გამოვლენილი შემთხვევების მიუხედავად, პრემიერ–მინისტრის, გიორგი გახარიას განცხადებით, ამ ეტაპზე ბათუმის ჩაკეტვა არ იგეგმება.

„მოგეხსენებათ, რომ ბათუმში დაფიქსირებული შემთხვევებიდან 22 ადამიანი გვყავს კვების ობიექტიდან. დღეს ბათუმში კონცენტრირებულია საკმაოდ მაღალი რაოდენობა ჩვენი მოქალაქეების, რომლებიც ისვენებენ და აქ ყურადღებაა გასამახვილებელი, გასაძლიერებელია ტესტირება ბულვარში და სხვადასხვა წერტილში. ჩვენ სპეციალურ საკარანტინო ზომებს ბათუმში არ ვაცხადებთ და ბათუმის ჩაკეტვაზე საუბარი არ არის“, - განაცხადა გიორგი გახარიამ.

დღეის მდგომარეობით კორონავირუსის დადასტურებულ შემთხვევათა რაოდენობა 1 548–ია, აქედან გამოჯანმრთელდა 1 270 პაციენტი, 19 კი გარდაიცვალა.

[ნუკა სტეფნაძე]