15 ახალი შემთხვევიდან ორის წყარო უცნობია

„ახალი შემთხვევებიდან ორის წყარო უცნობია, ჯერ ახალი შემთხვევაა და გრძელდება მოძიება. ამას რამდენიმე დღე კიდევ დასჭირდება“, – განაცხადა მარინა ეზუგბაიამ.

ეზუგბაიას განმარტებით მათ კლინიკაში 40 დადასტურებული შემთხვევაა. კლინიკამ ბოლო 24 საათში ოთხი პაციენტი მიიღო.

„ჩვენთან 40 დადასტურებული პაციენტი მკურნალობს. დღე–ღამის განმავლობაში შემოვიდა ოთხი დადასტურებული შემთხვევა, ერთი გახლავთ საბურთალოს, სამი შემოტანილი. აქედან ორი არის სომხეთიდან მინსკი–ერევანის რეისით და ერთი არის რუსეთიიდან ლარსის საზღვრიდან“, – თქვა ეზუგბაიამ.

ახალი პაციენტების მდგომარეობა საშუალოზე მძიმეა, ხოლო კლინიკაში მყოფი ორი მძიმე პაციენტიდან ერთის მდგომარეობა გაუმჯობესდა, განმარტა ეზუგბაიამ.

საქართველოში კორონავირუსის 879 დადასტურების შემთხვევა ფიქსირდება, აქედან 704 გამოჯანმრთელდა, ხოლო 14 გარდაიცვალა. 2 710 პირი კარანტინის რეჟიმში იმყოფება, სტაციონალური მეთვალყურეობის ქვეშ კი 267 მოქალაქე რჩება.

[ნუკა სტეფნაძე]