კორონავირუსის 28 ახალი შემთხვევიდან ოთხის წყარო უცნობია

როგორც ეზუგბაია აცხადებს, 12 შემთხვევა “დონას“ კლასტერს უკავშირდება, სამი პაციენტის წყაროა კონტაქტები დადასტურებულ შემთხვევებთან, კიდევ სამი პაციენტი რუსთავის „ავერსის“ კლინიკის თანამშრომლები არიან, ორი შემოტანილი შემთხვევაა, ოთხს აქვს მოგზაურობის ისტორია აჭარაში, ოთხ შემთხვევაზე კი, ეპიდკვლევა გრძელდება.

მისივე თქმით, ამჟამად, კოვიდცენტრებში მკურნალობს 275 პაციენტი, მათგან სამის მდგომარეობა კრიტიკულად მძიმეა, 16 კი, მძიმე.

„დაგვემატა 28 ახალი დადასტურებული შემთხვევა და რაოდენობა 1 596-ია. გამოჯანმრთელებულების რიცხვი 15-ით გაიზარდა და გახდა 1 294. გამოჯანმრთელებულების პროცენტული მაჩვენებელი ჯერ-ჯერობით კვლავ 81%-ია“, – განაცხადა მარინა ეზუგბაიამ.

თბილისის ინფექციური საავადმყოფოს სამედიცინო დირექტორის, განმარტებით, კონკრეტულად მათ კლინიკაში ამ დროისთვის 14 დადასტურებული შემთხვევაა, ამ პაციენტებიდან ერთის მდგომარეობა კრიტიკულად მძიმეა, ერთი კი მძიმე.

4 სექტემბრის მონაცემებით, საქართველოში კორონავირუსის დადასტურებული შემთხვევა - 1 596 –ია, მათ შორის გამოჯანმრთელებულია - 1 294, გარდაცვლილია - 19 ადამიანი.

კარანტინის რეჟიმში იმყოფება - 6 250 მოქალაქე, სტაციონარში მეთვალყურეობის ქვეშ კი - 289, რაც შეეხება უცხოეთიდან სამკურნალოდ გადმოყვანილ საქართველოს მოქალაქეების რაოდენობა ამ ეტაპზე - 41–ია.

[რიმა სარუხანიან]