კორონავირუსის 24 ახალი შემთხვევიდან ორის წყარო უცნობია

„დღე–ღამის განმავლობაში 24 ახალი შემთხვევა დაგვემატა, ამ შემთხვევიდან შვიდი არის შემოტანილი, იმპორტირებული, სატვირთო მანქანების მძღოლები არიან. ხუთი გახლავთ დაავადებულთან კონტაქტი, 10 შემთხვევა კი გარდაბნის რაიონის კვლევისას გამოვლენილ პირებში დადასტურდა, რაც შეეხება ორის წყაროს ჯერჯერობით უცნობია, მიმდინარეობს კონტაქტების კვლევა“, – განაცხადა მარინა ეზუგბაიამ.

მან აღნიშნა, რომ გარდაბნის მუნიციპალიტეტში შემთხვევების მატება მოსალოდნელი იყო, მაგრამ ეს პიკურ მდგომარეობას არ ნიშნავს.

„ახლა გვყავს გარდაბნის რაიონის კლასტერი. ოთხი სოფელია, სადაც მცხოვრებელთა რაოდენობა 7 ათასზე მეტია. შემთხვევების მატება, ალბათ, მოსალოდნელი იყო, რადგან გაჩნდა ახალი წყარო. ამ მუნიციპალიტეტის კვლევა კვლავ გრძელდება და თუ ჩვენ დაწესებულ რეგულაციებს შევასრულებთ, არამგონია, რომ გაცდეს ამ ახალ კლასტერს“, – თქვა ეზუგბაიამ.

როგორც, მან ჟურნალისტებს განუცხადა, მათ კლინიკაში 28 კოვიდინფიცირებული პაციენტი მკურნალობს, აქედან ორის მდგომარეობა მძიმეა.

„რაც შეეხება ჩვენს კლინიკას, გუშინ გამოჯანმრთელდა ორი პაციენტი და დაგვემატა ოთხი ახალი შემთხვევა, ამ ეტაპზე სულ 28 დადასტურებული შემთხვევაა. აქედან ორი მძიმე პაციენტია, რომელთა მდგომარეობა მკურნალობას ექვემდებარება და ვირუსი არ პროგრესირებს, რაც შეეხება დანარჩენებს, მათი მდგომარეობა საშუალო და მსუბუქი სიმძიმისაა“, – ამბობს ეზუგაბია.

საქართველოში კორონავირუსის 1 073 დადასტურებული შემთხვევა ფიქსირდება, აქედან 907 გამოჯანმრთელდა, ხოლო 16 გარდაიცვალა. 5 724 პირი კარანტინის რეჟიმში იმყოფება, სტაციონალური მეთვალყურეობის ქვეშ კი 247 მოქალაქე რჩება.

[ნუკა სტეფნაძე]