სამ საათზე მეტია “ქართული ოცნების” აქტივისტი დაკითხვაზე იმყოფება

ზაქაიძის დაკითხვასთან დაკავშირებით პირველი კომენტარი დაკითხვიდან გამოსულმა ადვოკატმა გიორგი ჯვარიძემ გააკეთა.

მისი თქმით, ზაქაიძეს სისხლის სამართლის კოდექსის 180-ე, თაღლითობის მუხლით, მოწმის სტატუსით ჰკითხავენ: ”ედავებიან, რომ 2001 წელს გორში 220 ტომარა ფქვილი იყიდა, რაშიც 4400 ლარი უნდა გადაეხადა. გადახდილი აქვს 3 100 ლარი, ნაწილი ისევ გადასახდელი აქვს. ამიტომ ის ვისთვისაც უნდა გადაეხადა, ჩივის, რომ თაღლითია და ფული ბოლომდე არ გადაუხდიაო”.

ადვოკატის თქმით, ზაქაიძე ამბობს, რომ მან თანხა სრულად გადაიხადა და ამის მოწმეებიც არსებობენ: “ზაქაიძე აცხადებს, რომ ეს არის პოლიტიკური დევნა. აქამდე ეს ფული გადახდილი რომ არ ქონოდა, 11 წლის განამვლობაში მოკითხავდნენ”.

ადვოკატის განცხადებით, ზაქაიძის დაკითხვა არჩევნებს უკავშირდება: “ასე ხალხს აშინებენ, ეს არის პოლიტიკური ზეწოლა”.

ჯვარიძის განცხადებით, ეს საქმე არანაირ კავშირში არაა სისხლის სამართლის დანაშაულთან: “ვერ ვხვდები რა შუაშია აქ პოლიცია, ან პროკურატურა. გამოძიებაში რა აქვთ, ჩემთვის ცნობილი არ არის, მაგრამ, რამდენადაც ვიცნობ საქმეს, ეს არის სამოქალაქო დავა. მომჩივანს შეეძლო მიემართა სასამართლოსთვის და თუ მართლა ექნებოდა ზაქაიძეს გადასახდელი, დააკისრებდნენ გადასახადს”.

ასპინძის შტაბის ხელმძღვანელი ტარიელ ივანიშვილი ამბობს, რომ ზაქაიძეს თავს ასე ადვილად არ დაანებებენ, რადგან ის შტაბის აქტიური წევრია: “ეს არის წმინდა პოლიტიკური ტერორი, კლასიკური მაგალითი, როგორ შეიძლება შეაშინო მოსახლეობა. თუ “ქართულ ოცნებას” დაუჭერ მხარს, მოგიძებნიან სარჩულს, რომ გამოგთიშონ პოლიტიკური საქმიანობიდან”.

ზაქაიძის ბავშვობის მეგობრის და ასპინძის შტაბის წევრის პაატა ქავთარაძის თქმით, ზექაიძეზე ზეწოლა მას შემდეგ ხორციელდება, რაც მან ბიძინა ივანიშვილის მოქალაქეობის აღდგენასთან დაკავშირებით ასპინძაში ხელმოწერების შეგროვება დაიწყო: “ამ მიზეზით სასწრაფო დახმარების სამსახურიდან მისი მეუღლეც გაათავისუფლეს”.

ზაქაიძის დაკითხვა დღეს დაახლოებით 14:30 საათზე დაიწყო და ამ წუთებშიც გრძელდება. ზაქაიძეს ინსპექტორ-გამომძიებელი გიორგი ზარიძე ჰკითხავს.

[თამუნა უჩიძე, ახალციხე]