შსს-მ „ქართული ოცნების“ ასპინძის შტაბის წევრის ცემაში ბრალდებული დააკავა

ინფორმაციას საქართველოს შინაგან საქმეთა სამინისტრო ავრცელებს. მისი ინფორმაციით, პოლიტიკური კოალიცია ,,ქართული ოცნების" ასპინძის შტაბის ხელმძღვანელი ტარიელ ივანიშვილი გელა მურადაშვილს პირდებოდა, რომ პოლიტიკური დავალებების შესრულებების სანაცვლოდ, გარკვეული პერიოდის შემდგომ გააწევრიანებდა და ოფიციალურ სამსახურს შესთავაზებდა პოლიტიკურ კოალიცია “ქართულ ოცნებაში“, სადაც მურადაშვილს ექნებოდა სოლიდური ანაზღაურება. ასევე აღნიშნულ პერიოდში მურადაშვილი მიცემული პოლიტიკური დავალებების შესასრულებლად ხარჯავდა პირად თანხებს.

“გარკვეული პერიოდის შემდგომ ივანიშვილმა უარი განუცხადა მურადაშვილს მასზე მიცემული პირობის შესრულებაში. რაზედაც მათ შორის დაიძაბა ურთიერთობა და ა/წ 22 მაისს გელა მურადაშვილი საქმის გასარკვევად მივიდა ტ.ივანიშვილთან ოფისში, ურთიერთშელაპარაკების დროს ბრალდებულმა გ. მურადაშვილმა ფიზიკური შეურაწყოფა მიაყენა ტ.ივანიშვილს“, - ნათქვამია შსს-ს მიერ გავრცელებულ განცხადებაში.

შინაგან საქმეთა სამინისტროს ასპინძის რაიონულმა პოლიციამ გელა მურადაშვილი დღეს დააკავა. მიმდინარეობს გამოძიება საქართველოს სისხლის სამართლის კოდექსის 239-ე მუხლით.

[Sknews.ge]