ლეგაშვილის ხუთსაათიანი დაკითხვა დასრულდა

სამცხე-ჯავახეთის სამხარეო მთავარი სამმართველოს ყოფილი უფროსი კახაბერ ლეგაშვილი 2007 წელს ახალქალაქში მშენებარე პოლიციის ერთ-ერთი განყოფილების სარემონტო სამუშაოების შესახებ დაკითხეს.

- ”პოლიციის შენობის გარემონტებაზე დამისვეს კითხვები, სხვა არაფერზე უკითხავთ. თუ ახალი ფაბრიკაცია რაიმე დანაშაულის არ მოიგონეს, ალბათ დაკითხვაზე მოსვლა აღარ მომიწევს. ეს არ იყო ფაბრიკაცია, მაგრამ ბევრი რამის მოგონება შეიძლება”, - გვითხრა დაკითხვიდან გამოსულმა ლეგაშვილმა და იხუმრა, - დაკითხვა მშვიდ გარემოში მიმდინარეობდა, ჩაი ვითხოვე და არ მომიტანეს, არ ჰქონდათ”.

ლეგაშვილი დაკითხვაზე ადვოკატთან გიორგი გელხაურთან ერთად იმყოფებოდა.

”კანონდარღვევა არ ყოფილა, მშვიდად ჩაიარა დაკითხვამ”, - განაცხადა გელხაურმა.

ლეგაშვილს სამცხე-ჯავახეთის საოლქო პროკურატურის საგამოძიებო ნაწილის უფროსი გამომძიებელი თემურ გურამიშვილი ჰკითხავდა. მისი თქმით, დაკითხვა სამცხე-ჯავახეთის საოლქო პროკურატურის საგამოძიებო ნაწილში კონკრეტული სისხლის სამართლის საქმესთან დაკავშირებით მოხდა.

- ”ლეგაშვილი მოწმის სახით დაიკითხა. საქმის დეტალების გამხელისგან ამ ეტაპზე გამოძიების ინტერესებიდან გამომდინარე, თავს შევიკავებ, მოგვიანებით ყველაფერი ცნობილი გახდება”, - ამბობს გურამიშვილი.

ლეგაშვილი დაკითხვაზე 15:00 საათზე შევიდა. მას სამცხე-ჯავახეთის სამხარეო მთავარი სამმართველოს უფროსის თანამდებობა 2007 წლამდე ეკავა. ამჟამად კი თბილისის მერიის დაცვის სამსახურის უფროსია.

[თამუნა უჩიძე, ახალციხე]