მესხური ტრადიციების აღსადგენად მემორანდუმი გაფორმდა

მემორანდუმი დღეს, 22 ივლისს, ახალციხის ციხის ისტორიული კომპლექსის ციტადელზე გაფორმდა. მას ხელი პარლამენტის ეროვნული ბიბლიოთეკის გენერალურმა დირექტორმა გიორგი კეკელიძემ და „ჭაჭკარის განვითარების ფონდის“ პრეზიდენტმა გიორგი ნათენაძემ მოაწერეს.

„დღეს ისტორიული დღეა, რადგან ხელს ვაწერთ მემორანდუმს, რომელიც ეხება მესხეთის ისტორიის კვლევას, ეთნოგრაფიული კუთხით. ჩვენ დაკარგული გვაქვს ჩვენი ტანისამოსი, როგორი ჩაცმულობა გვქონდა მესხეთში, როგორი ელემენტები იყო; მეღვინეობაში არ ვართ სრულად ინფორმირებული, რა ტრადიციები გვქონდა, რა მეთოდი არსებობდა ღვინის დაყენების და ა.შ. ძალიან საინტერესო პარალელები იკვეთება ჭაჭკართან ისტორიულ, მესხურ სოფელთან“, - განმარტა გიორგი ნათენაძემ.

როგორც პარლამენტის ეროვნული ბიბლიოთეკის ხელმძღვანელი გიორგი კეკელიძე განმარტავს, მესხური ტრადიციების აღდგენისათვის მუშაობა სამი წლის წინ დაიწყეს: „დაწყებულია არქივებზე, ტოპონიმიკაზე მუშაობა, კონკრეტული სამოსის, კულინარიული მიმართულებებისა და კულტურული მიმართულებების კვბლევაზე, რომლებსაც ჩვენ მალე გამოვცემთ და ამავდროულად ელექტრონული ფორმით მივაწვდით ჩვენს დაინტერესებულ მკითხველს“.

1. მემორანდუმის ფარგლებში, ეროვნული ბიბლიოთეკა სთავაზობს ფონდს, უსასყიდლოდ ისარგებლონ საგამოფენო და საკონფერენციო დარბაზებით;

2. ეროვნული ბიბლიოთეკა და ფონდი ერთობლივად განახორციელებენ სხვადსხვა სახის კვლევით პროექტებს, კონკრეტულად კი:
- ბიბლიოთეკა დაეხმარება ფონდს მესხური ტრადიციული კულტურის ელემენტების ფორმებისა და ინფორმაციის მოძიებაში;
- ბიბლიოთეკა დაეხმარება ფონდს მესხეთში არსებული ისტორიული მნიშვნელობის მქონდე ძეგლების მოძიებაში;
- ბიბლიოთეკა დაეხმარება ფონდს სოფელ ჭაჭკარის ისტორიის, მისი წარმოშობის, ტოპონიმიკის, ტრადიციებისა და ლეგენდების მოძიებაში, მის ფონდში არსებულ მასალებზე დაყრდნობით;
- ეროვნული ბიბლიოთეკა და ფონდი განახორციელებენ ერთობლივ საგამომცემლო საქმიანობას;

3. ფონდი, თავის მხრივ, ბიბლიოთეკას მიაწვდის მის ხელთ არსებულ ყველა ინფორმაციას, ზემოთ ჩამოთვლილ ყველა საკითხზე. ფონდი იზრუნებს მოძიებული ინფორმაციის შესაბამისად აღადგინოს მესხური ტრადიციული და ავთენტური ტანისამოსი, მესხური მივიწყებული კერძები, ფონდი იზრუნებს სოფელ ჭაჭკარის აღდგენა-რევიტალიზაციაზე.

მემორნადუმი სამი წლის ვადით დაიდო.



[თაკო ფეიქრიშვილი, ახლციხე]