'საქართველოს რკინიგზასა' და 'სოლიდარობის ფონდს' შორის მემორანდუმი გაფორმდა [R]

"საქართველოს რკინიგზის" ხელმძღვანელთა და ადმინისტრაციის თანამშრომელთა ინიციატივითა და სურვილით მათი ხელფასიდან ყოველთვიურად განხორციელდება დონაცია. აღსანიშნავია რომ გაფორმებული მემორანდუმი თანამშრომლობის გაგრძელებას გულისხმობს, რადგან რკინიგზელები საქველმოქმედო აქციაში 2015 წლიდან არიან ჩართულნი.

დოკუმენტს ხელი სს “საქართველოს რკინიგზის” გენერალურმა დირექტორმა დავით ფერაძემ და სოლიდარობის ფონდის აღმასრულებელმა დირექტორმა ია მაქაცარიამ მოაწერეს.

"საქმე, რომელსაც საქართველოს სოლიდარობის ფონდი ემსახურება უმნიშვნელოვანესია ჩვენი ქვეყნისთვის. თითოეული რკინიგზელი სრულად იზიარებს ამ მნიშვნელობას და საკუთარი ინიციატივით თავისი მცირედი წვლილი შეაქვს ისეთ დიდ და საყოველთაო საქმეში, როგორიც ბავშვების სიცოცხლის გადარჩენაა. ეს არის ჩვენი, როგორც საქართველოს მოქალაქეების სოციალური პასუხისმგებლობა", - აცხადებს "საქართველოს რკინიგზის" გენერალური დირექტორი დავით ფერაძე.

"მნიშვნელოვანია, რომ საჯარო თუ კერძო სექტორის წარმომადგენლებმა საკუთარი წვლილი შეიტანონ ქველმოქმედებაში. ყოველი ერთით მეტი დონორი გვაძლიერებს. საქართველოს რკინიგზა ჩვენი დიდი ხნის მეგობარია და მოხარულები ვართ, რომ ეს თანამშრომლობა მომავალშიც გაგრძელდება. ონკოლოგია 21-ე საუკუნის მნიშვნელოვან პრობლემად რჩება და ამ მხრივ გამონაკლისი არც საქართველოა. სიმსივნით დაავადებულ ბავშვებს და მათ ოჯახებს დღეს განსაკუთრებული თანადგომა სჭირდებათ, სწორედ ამას ემსახურება სოლიდარობის ფონდი",- აცხადებს სოლიდარობის ფონდის აღმასრულებელი დირექტორი ია მაქაცარია.

"სოლიდარობის ფონდი" საქართველოს პრემიერ-მინისტრის ინიციატივით 2014 წელს შეიქმნა. ფონდი სიმსივნით დაავადებული ბავშვების და 22 წლამდე ახალგაზრდების მკურნალობას და დიაგნოსტირებას აფინანსებს. აღსანიშნავია, რომ 2014 წლიდან დღემდე ფონდმა 611 ბენეფიციარის დაფინანსება შეძლო, სულ მობილიზდა 15 000 000 ლარი.