სამცხე–ჯავახეთის მუზეუმის ეთნოგრაფიულ ფონდს, რომელიც 5 წელია სარდაფშია გამოკეტილი, დარბაზში გადაიტანენ

ახალციხის მუნიციპალიტეტის მერის ზაზა მელიქიძის განცხადებით, სამცხე–ჯავახეთის მუზეუმის ადმინიტრაციისა და ეთნოგრაფიული ფონდის განსათავსებლად შენობა მუნიციპალური განვითარების ფონდის დაფინანსებით აშენდება.

ახალციხის ციხის მიმდებარე ტერიტორიაზე ადგილის გამოყოფის საკითხზე საკრებულომ დღეს, 15 დეკემბერს ისჯელა. ადგილი მუზეუმს უზურფუქტით უნდა გადაეცეს.

„ეს იქნება ტერასული ტიპის ორსართულიანი შენობა, სადაც განთავსდება საგამოფენო და საკონფერენციო დარბაზი, ბიბლიოთეკა. ის ყველაფერი, რაც უნივერსიტეტის სარდაფშია დაცული, გადმოვა და საცავში განთავსდება. შენობა შესაბამისობაში იქნება ციხის ინფრასტრუქტურასთან“, – განაცხადა საკრებულოს სხდომაზე ზაზა მელიქიძემ.

მისი თქმით, შენობა, რომლის მშენებლობაც 2018 წელში დაიწყება, სავიზიტო ბარათი იქნება ახალციხისთვის: „შენობის მიმდებარედ ტერიტორიაც მოწესრიგდება“.

შეგახსენებთ, რომ სამცხე–ჯავახეთის მუზეუმის ექსპონატები და სამეცნიერო ბიბლიოთეკა სამცხე–ჯავახეთის უნივერსიტეტის მეორე კორპუსის სარდაფში 2012 წლის აგვისტოში ჩაიტანეს, მას შემდეგ, რაც რაბათში სარეაბილიტაციო სამუშაოები დაიწყო. ახალციხის ციხის რეაბილიტაციის დასრულების შემდეგ, ექსპონატების ნაწილი განახლებულ მუზეუმში აიტანეს და ვიტრინებში განათავსეს. ნაწილი კი ისევ სარდაფში დარჩა, სადაც პირობები არ არის და ნივთები ზიანდება.

სამცხე–ჯავახეთის ისტორიული მუზეუმი 80 წლისაა, მისი საბიბლიოთეკო ფონდიც და ექსპონატებიც უნიკალურია.

[თინათინ ზაზაძე, ახალციხე]