მესხური ღვინო ტოკიოს ღვინის ფესტივალზე

ფესტივალზე მესხური ღვინო მისმა მწარმოებელმა, „სამცხე–ჯავახეთის ტრადიციული მეღვინეობის ასოციაციის“ დამფუძნებელმა გიორგი ნათენაძემ წარადგინა.

ნათენაძე, 7 ქართველ მეღვინესთან ერთად, იაპონიაში ერთი კვირის განმავლობაში ეწეოდა მესხური ღვინის პროპაგანდას. იგი ამბობს, რომ იაპონია ყველაზე დიდი ბაზარია ნატურალური ღვინის გასაღების თვალსაზრისით, საქართველო კი მათთვის ნამდვილი აღმოჩენაა: „მიგვიწვიეს იაპონელმა იმპორტიორებმა, რომლებიც ჩვენი ღვინის ექსპორტს ეწევიან. ნატურალურ ღვინოში იგულისხმება ის, რომ ჩვენ არ ვიყენებთ ქიმიურ დანამატებს, არც ვენახში და არც ღვინის წარმოებაში, აქ ყველაფერი ბუნებრივია. ქვევრის ნატურალურმა ღვინომ იაპონელ სომელიებზე და ღვინის მომხმარებლებზე ძალიან დიდი შთაბეჭდილება მოახდინა“.

ქართველი მეღვინეები იაპონიის სამ ქალაქში ოსაკაში, კიოტოში და ტოკიოში ნატურალურ ღვინის სხვადასხვა ბარს ესტურნენ. მათ საშუალება ჰქონდათ პირადად გასაუბრებოდნენ ღვინის მოყვარულებს.

„ოსაკაში და ტოკიოში ჩატარდა ღვინის სემინარი და დეგუსტაცია, აქაც ათასობით დაინტერესებულმა სომელიემ თუ მოყვარულმა მოიყარა თავი. ყველას ძალიან მოსწონდა ქართული ღვინო და საოცარ შთაბეჭდილებებს გვიზიარებდნენ. ჩვენი ღვინით დაინტერესდნენ იაპონური რესტორნებისა და ბარების მეპატრონეები. მათ უკვე გამოხატეს ღვინის შეძენის სურვილი“, – ამბობს ქართველი მეღვინე.

მისივე თქმით, ეს პირველი შემთხვევა იყო, როცა მესხური ღვინო ექსპორტზე გაიტანა: „უცხოელები კარგად გრძნობენ და მოსწონთ მესხური ღვინის უცხო არომატი“.

გიორგი ნათენაძემ მესხური ღვინო პირველად 2006 წელს ჩამოასხა. მიმდინარე, 2014 წელს კი უკვე „სამცხე–ჯავახეთის ტრადიციული მეღვინეობის ასოციაცია“ დააარსა და ამ მიმართულებით სერიოზული გეგმები აქვს. ამბობს, რომ მომავალი წლიდან ხიზაბავრის ისტორიული ტერასების აღდგენას და მესხური ჯიშების გაშენებას აპირებს.

„ამ პროექტზე უკვე 2 წელია ვმუშაობ და სამუშაოები რეალურად გაზაფხულიდან დაიწყება. ეს იქნება ისტორიული ფაქტი და ძალიან კარგი სანახაობა ტურისტებისთვის, ამუშავდება ღვინის ტურიზმი და იმედი მაქვს, რომ მეტ ხალხს დავაინტერესებ ჩვენს რეგიონში მესხური ღვინით. დღესდღეობით 28 მესხური ჯიში მაქვს მოძიებული და გამზადებული ტერასებზე გასაშენებლად“, – ამბობს იგი.

ქართველი მეღვინეების ვიზიტი იაპონიაში საქართველოს ღვინის ეროვნული სააგენტომ დააფინანსა, რომელიც ცდილობს ქართულ ღვინოს პოპულარიზაცია გაუკეთოს მსოფლიო ბაზარზე.

[თამარ თოთაძე, ახალციხე]