ჭელაში პრეზიდენტის სარეზერვო ფონდის მხარდაჭერით ბიბლიოთეკა გაიხსნა

საქართველოს პრეზიდენტის ადმინისტრაციის უფროსმა გიორგი აბაშიშვილმა, ასევე პრეზიდენტის სარეზერვო ფონდის მიერ დაფინანსებული პროექტის „ინტერნეტი ყველა სოფლის ბიბლიოთეკას“ ფარგლებში, სოფელ ჭელას ბიბლიოთეკას კომპიუტერული ტექნიკა გადასცა.

პრეზიდენტის ადმინისტრაციის უფროსმა ადგილობრივი თემის წარმომადგენლებთან შეხვედრა გამართა და სოფელში მცხოვრები ახალგაზრდების საგანმანათლებლო საჭიროებებზე ისაუბრა.

როგორც გიორგი აბაშიშვილმა შეხვედრისას აღნიშნა, სარეზერვო ფონდი დამატებით სახელმძღვანელოებით დაეხმარება ბიბლიოთეკას, რომლებიც სტუდენტებსა და აბიტურიენტებს გამოცდებისთვის მოსამზადებლად ესაჭიროებათ.

„ძალიან მნიშვნელოვანია ასეთი ტიპის სოფლებში მსგავსი ჩართულობის ცენტრების არსებობა, ვინაიდან ეს არის საშუალება ახალგაზრდებისთვის მიიღონ დამატებითი განათლება, ასევე მოეწყოს დისკუსიები სამოქალაქო განათლების საკითხებზე. ასევე დღეს მივიღეთ გადაწყვეტილება და ბიბლიოთეკას დავეხმარებით სხვადასხვა ლიტერატურით, რომელიც ძირითადად შეეხება იმ საგანმანათლებლო საჭიროებებს, რაც სჭირდებათ აქ მცხოვრებ სტუდენტებსა და აბიტურიენტებს“,- აღნიშნა გიორგი აბაშიშვილმა

შეხვედრას თემის უხუცესი და სოფელში მცხოვრები ახალგაზრდობა ესწრებოდა.

"ნებისმიერი აღმსარებლობის და მიმდინარეობის ადამიანებისთვის არის ეს ბიბლიოთეკა, კარი ყველასთვის ღიაა. სალოცავთან კავშირი არ აქვს და ცალკე შესასვლელი აქვს. ამ ეტაპზე წიგნების დალაგების პროცესში ვართ", – ამბობს ჭელას მეჩეთის წინამძღვარი ჯამბულ აბულაძე.

[sknews.ge]