სამცხე-ჯავახეთში რეგიონის განვითარებისთვის ფონდს ქმნიან

„მესხეთ-ჯავახეთის აღორძინების ფონდი“, - ასე ერქმევა ფონდს, რომელშიც რეგიონის თითოეული მუნიციპალიტეტიდან სამი წარმომადგენელი გაერთიანდება.

აღნიშნული ფონდის ჩამოყალიბებაზე, საინიციატივო ჯგუფის წევრებმა, დღეს, 2 ივლისს, „დემოკრატიული ჩართულობის ცენტრში“ იმსჯელეს. ფონდი ოფიციალურად ორშაბათს, 8 ივლისს დაფუძნდება.

„ჩვენ აქტიურად ჩავერთვებით ფონდის საქმიანობაში. დიდი ხანია ამ რეგიონში ვმუშაობთ და კარგად ვიცნობთ მის პრობლემატიკას“,-ამბობს „რეგიონული განვითარების სააგენტოს“ დირექტორი ნანა ზუბაშვილი. მისივე თქმით, რეგიონიდან ავტორიტეტული პიროვნებები შეირჩევიან და ფონდის დამფუძნებლები ისინი იქნებიან.

სამცხე-ჯავახეთის რეგიონის ყველა მუნიციპალიტეტიდან სამ-სამი დამფუძნებელი შეირჩევა. ფონდის ცენტრალური ოფისი ახალციხეში იქნება.

„ამ ეტაპზე ინფორმაციის გავრცელებას დავიწყებთ, გვინდა საზოგადოებამ იცოდეს, რა ფუნქცია ექნება ფონდს. ასევე, მოვიძევთ პრობლემებს, რომლთა მოგვარებაზეც ფონდი იმუშავებს“,- ამბობს საინიციატივო ჯგუფის წევრი ზურაბ ხუციშვილი.

საინიციატივო ჯგუფი მორიგ შეხვედრას ორშაბათს, 12 საათზე გამართავს. ამავე დღეს ფონდი ოფიციალურად დარეგისტრირდება.

[ნინო ზედგინიძე, ახალციხე]