ახალციხის ბიბლიოთეკამ 120 წლის იუბილე აღნიშნა

ახალციხის ცენტრალური ბიბლიოთეკის 120 წლის იუბილე ქალაქის მერიის, კულტურული დაწესებულებების ყოფილმა და ამჟამინდელმა წარმომადგენლებმა, სასულიერო პირებმა და მკითხველებმა აღნიშნეს. ღონისძიება რესტორან „რაბათში“ გაიმართა.


1895 წლის 27 აგვისტოს ახალციხეში, პავლე ერეკლიშვილის ბინაში საქართველოში რიგით მესამე ბიბლიოთეკა გაიხსნა, რომელიც ილია ჭავჭავაძის თაოსნობით წერა–კითხვის გამავრცელებელმა საზოგადოებამ დაარსა.

ბიბლიოთეკარი ლილი აჩელაშვილი უკვე 44 წელია ახალციხის ცენტრალურ ბიბლიოთეკაში მუშაობს.

„დაარსებიდან 120 წლის განმავლობაში ჩვენი ბიბლიოთეკა იყო ერთ–ერთი მოწინავე საქართველოში. ყოველთვის გვყავდა 3000–მდე მკითხველი, შესანიშნავი ფონდი გვქონდა და დღემდე შევინარჩუნეთ“, – ამბობს ახალციხის ცენტრალური ბიბლიოთეკის მთავარი სპეციალისტი ლილი აჩელაშვილი.

მისივე თქმით, ამჟამად მკითხველთა რაოდენობა შედარებით ნაკლებია. ამ ეტაპზე ახალციხის ცენტრალურ ბიბლიოთეკას 2 000–მდე მკითხველი და წიგნადი ფონდის რაოდენობა 47 000 შეადგენს.

ახალციხის ცენტრალური ბიბლიოთეკის საიუბილეო თარიღისადმი მიძღვნილი ღონისძიება ახალციხის მერიის კულტურის დაწესებულებათა გაერთიანების ორგანიზებითა და მერიის ფინანსური მხარდაჭერით გაიმართა.

„ძალიან დიდი ისტორიის, ტრადიციების მატარებელია ჩვენი ბიბლიოთეკა, დიდი ხნის განმავლობაში გვინდოდა, რომ გაგვეკეთებინა საიუბილეო საღამო, მაგრამ ობიექტური თუ სუბიექტური მიზეზების გამო ვერ მოხერხდა. ამჯერად ქალაქის მერიის მხარდაჭერით მოვახერხეთ საიუბილეო საღამოს ჩატარება“, – ამბობს ქალაქ ახალციხის მუნიციპალიტეტის მერიის კულტურის დაწესებულებათა გაერთიანების დირექტორი ზაირა კელაპტრიშვილი.


[თამარ თოთაძე, ახალციხე]