ირაკლი ღარიბაშვილი: ‘ბავშვებს არ უყვართ ძველი გამოცემის წიგნები’

ეროვნული სამეცნიერო ბიბლიოთეკის 15 თანამშრომელი ახალციხეს გუშინ ესტუმრა. თანამშრომლები არაფორმალურ გარემოში, ბიბლიოთეკის ერთწლიან მუშაობას აფასებენ და სამომავლო სტრატეგიულ გეგმებზე მსჯელობენ.

დღეს, 6 ივლისს, ეროვნული სამეცნიერო ბიბლიოთეკის თანამშრომლები ახალციხის ცენტრალურ ბიბლიოთეკას ესტუმრნენ.

ეროვნული სამეცნიერო ბიბლიოთეკის დირექტორი, ირაკლი ღარიბაშვილი ამბობს, რომ ბიბლიოთეკის ახალ შენობაში გადმოტანა დადებითი მოვლენაა, თუმცა, ამჟამინდელი ფართი პატარაა და წიგნებს კარგად ვერ იტევს.

მისივე თქმით, ახალციხის საჯარო ბიბლიოთეკაში განსაახლებელია საბავშვო ფონდი: „ბავშვების მოსაზიდად კარგი იქნება ფონდის ახალი წიგნებით გამდიდრება. ბავშვებს არ უყვართ ძველი გამოცემის წიგნები“.

ეროვნული სამეცნიერო ბიბლიოთეკა ახალციხელ კოლეგებთან თანამშრომლობის გაგრძელებას სამომავლოდაც აპირებს. კერძოდ, გეგმავენ ელექტრონული კატალოგის დამატებას.

ხვალ ბიბლიოთეკარები სამცხე–ჯავახეთის სახელმწიფო უნივერსიტეტს ესტუმრებიან და რამდენიმე თვის წინ, მათი ინიციატივით გახსნილ საინფორმაციო ცენტრს მოინახულებენ. ხვალვე იგეგმება უნივერსიტეტის რექტორთან მერაბ ბერიძესთან შეხვედრა.

[ნანა მიქელაძე, ახალციხე]