'5 ახალი შემთხვევის პირველწყაროზე ვერ გავდივართ' – გამყრელიძე

"ცოტა შეგვაშფოთა ამ სიტუაციამ, ხუთი ახალი შემთხვევიდან ამ ეტაპამდე ვერ გავდივართ პირველ წყაროზე. ამიტომ მე გავაკეთე პრევენციული განცხადება დღეს, რადგან მედია საშუალებით ვრცელდება კადრები, სადაც ჩანს როგორ ერთობიან ადამიანები თავშეყრის ადგილებში, არ იცავენ შესაბამის რეკომენდაციებს, ეს არის პირბადის ტარება, სოციალური დისტანცია, პირადი და საზოგადოებრივი ჰიგიენა", – განაცხადა გამყრელიძემ "პალიტრანიუსის" გადაცემაში "საღამოს ნიუსრუმი".

მისი თქმით, შემსუბუქების პერიოდში საზოგადოების ნაწილმა ჩათვალა, რომ ჩვენ უკვე დავამარცხეთ კორონავირუსი, რის გამოც აღარ იცავს რეკომენდაციებს ან ნაკლებად იცავს: "კიდევ ერთხელ მინდა ხაზი გავუსვა, რომ კორონავირუსი არსად გამქრალა, ინფექცია არის ჩვენთან ერთად და ტრიალებს ქვეყანაში. მიუხედავად იმისა, რომ საქართველო ამ ეტაპამდე შედარებით ნაკლები დაზიანებით მიდის, ეს არ გვაძლევს დამშვიდების უფლებას, რადგან ქვეყანაში ვირუსი ცირკულირებს.კიდევ ერთხელ მოვუწოდებ მოსახლეობას - ნუ მოვეშვებით!".

10 მაისს, დღის განმავლობაში კორონავირუსით ინფიცირების ცხრა ახალი შემთხვევაა გამოვლენილი, აქედან ოთხი ინფიცირების წყარო ცნობილია, ხუთის კი არა.

[sknews.ge]